ಸುದ್ದಿಬಿಂದು ಬ್ಯೂರೋ ವರದಿ
ಹೊನ್ನಾವರ : ಧರ್ಮಸ್ಥಳದ ಶ್ರೀರಾಮಕ್ಷೇತ್ರ ಮಹಾಸಂಸ್ಥಾನದ ಗುರುಗಳಾದ ಬ್ರಹ್ಮಾನಂದ ಸರಸ್ವತಿ ಸ್ವಾಮೀಜಿಯವರಿಂದ ೨೦೧೩ನೇ ಸಾಲಿನಲ್ಲಿ ಉದ್ಘಾಟನೆಗೊಂಡ ಶ್ರೀರಾಮನಾಥ ಪತ್ತಿನ ಸಹಕಾರಿ ಸಂಘಕ್ಕೆ ಕಳೆದ ವಾರ್ಷಿಕ ಅವಧಿಯಲ್ಲಿ ೪೫.೨೨ ಲಕ್ಷ ರೂ ಲಾಭವಾಗಿದೆ.
ಸಂಘದ ೧೪ನೇ ವಾರ್ಷಿಕ ಸರ್ವ ಸಾಧಾರಣ ಸಭೆ ಸೆಪ್ಟೆಂಬರ್ ೧೯ರ ಶನಿವಾರ ಮಧ್ಯಾಹ್ನ ೩ ಗಂಟೆಗೆ ಹೊನ್ನಾವರದ ಕಚೇರಿಯಲ್ಲಿ ಸಂಘದ ಅಧ್ಯಕ್ಷ ಎನ್. ವಿ. ನಾಯ್ಕ ಹೆರವಟ್ಟಾ ಇವರ ಅಧ್ಯಕ್ಷತೆಯಲ್ಲಿ ನಡೆಯಿತು. ಸಭೆಗೆ ಸಂಘದ ವಿವಿಧ ಆಯಾಮಗಳ ಬಗ್ಗೆ ಮಾಹಿತಿ ನೀಡಿದ ಅಧ್ಯಕ್ಷರು, “ಸಂಘವು ಹೊನ್ನಾವರ, ಕುಮಟಾ, ಬಳಕೂರು, ಹಡಿನಬಾಳ, ಚಂದಾವರ ಹೀಗೆ ೫ ಶಾಖೆಗಳನ್ನು ಹೊಂದಿದ್ದು, ೫೦೯೧ ಶೇರುದಾರ ಸದಸ್ಯರೊಂದಿಗೆ ರೂಪಾಯಿ ೧.೭೭ ಕೋಟಿ ಶೇರು ಬಂಡವಾಳ, ರೂಪಾಯಿ ೪೦.೩೪ ಕೋಟಿ ದುಡಿಯುವ ಬಂಡವಾಳದೊಂದಿಗೆ ಮುನ್ನಡೆಯುತ್ತದೆ. ರೂಪಾಯಿ ೩೫.೧೩ ಕೋಟಿ ವಿವಿಧ ಠೇವಣಿ ಸಂಗ್ರಹಿಸಿ ರೂಪಾಯಿ ೪.೨೩ ಕೋಟಿ ಬ್ಯಾಂಕುಗಳಲ್ಲಿ ಹೂಡಿಕೆ ಮಾಡಲಾಗಿದೆ.
ರೂಪಾಯಿ ೩೬.೮೦ ಕೋಟಿ ಸಾಲ ನೀಡಲಾಗಿದ್ದು, ಸಾಲ ವಸೂಲಾತಿ ಪ್ರಮಾಣ ಶೇಕಡಾ ೯೫.೫೨ ಇದೆ. ಸದಸ್ಯರೆಲ್ಲರ ಸಹಕಾರ, ಉತ್ಸಾಹಿ ಆಡಳಿತ ಮಂಡಳಿಯ ಮಾರ್ಗದರ್ಶನ, ಸಿಬ್ಬಂದಿ ವರ್ಗದವರ ಸೇವಾ ಮನೋಭಾವ ಸಂಸ್ಥೆಯನ್ನು ಈ ಮಟ್ಟಕ್ಕೆ ಬೆಳೆಸಿದ್ದು, ಇನ್ನು ೩ ವರ್ಷಗಳಲ್ಲಿ ದುಡಿಯುವ ಬಂಡವಾಳ ೧೦೦ ಕೋಟಿಗೆ ಹೆಚ್ಚಿಸುವ ಗುರಿ ಹೊಂದಲಾಗಿದೆ. ಪ್ರಸಕ್ತ ವರ್ಷ ರೂ ೪೫.೨೨ ಲಕ್ಷ ನಿವ್ವಳ ಲಾಭಗಳಿಸಿ ಶೇಕಡಾ ೮.೫ರಷ್ಟು ಡಿವಿಡೆಂಡ್ ಘೋಷಿಸಲಾಗಿದೆ. ಪ್ರಸಕ್ತ ಸಾಲಿನಲ್ಲಿ ಚಂದಾವರ ಶಾಖೆಯಲ್ಲಿ ಬಂಗಾರ ಅಡಮಾನ ಸಾಲ ಪ್ರಾರಂಭಿಸಲು ನಿರ್ಧರಿಸಲಾಗಿದ್ದು, ಮುಂದಿನ ದಿನಗಳಲ್ಲಿ ಎಲ್ಲಾ ಶಾಖೆಗಳಲ್ಲಿ ಬಂಗಾರ ಅಡಮಾನ ಸಾಲ ವಿಸ್ತರಿಸಲಾಗುವುದು” ಎಂದು ತಿಳಿಸಿದರು.
ಸಂಘದ ನಿರ್ದೇಶಕರಾದ ಹೆಚ್. ಆರ್. ನಾಯ್ಕ, ಜಿ. ಜಿ. ನಾಯ್ಕ, ನಾಗೇಶ ನಾಯ್ಕ, ಶ್ರೀಕಾಂತ ನಾಯ್ಕ, ಶಿವಾನಂದ ನಾಯ್ಕ, ವೀಣಾ ನಾಯ್ಕ, ಜಾನಕಿ ನಾಯ್ಕ, ಮಾದೇವಿ ನಾಯ್ಕ, ಮಾಸ್ತಿ ಮುಕ್ರಿ ಮತ್ತು ಶೇರುದಾರ ಸದಸ್ಯರು ಅಲ್ಲದೇ ಶಾಖಾ ವ್ವಸ್ಥಾಪಕರಾದ ರಾಜೇಶ ನಾಯ್ಕ, ಶ್ರೀಧರ ನಾಯ್ಕ, ಪ್ರಮೋದ ನಾಯ್ಕ, ನಿತಿನ್ ನಾಯ್ಕ, ಸಂದೀಪ ನಾಯ್ಕ ಮತ್ತು ಸಿಬ್ಬಂದಿ ವರ್ಗದವರು, ಪಿಗ್ಮಿ ಸಂಗ್ರಾಹಕರು ಸಭೆಯಲ್ಲಿ ಉಪಸ್ಥಿತರಿದ್ದರು. ಉಪಾಧ್ಯಕ್ಷ ಸುರೇಶ ನಾಯ್ಕ ಸ್ವಾಗತಿಸಿದರು. ನಿರ್ದೇಶಕ ಆರ್. ಎಮ್. ನಾಯ್ಕ ಪ್ರಾಸ್ತಾವಿಕ ಮಾತಾಡಿದರು. ನಿರ್ದೇಶಕ ಮಂಜುನಾಥ ನಾಯ್ಕ ಸಂಸ್ಥೆಯ ಪ್ರಗತಿ ಚಿತ್ರಣ ನೀಡಿದರೆ ನಿರ್ದೇಶಕ ಜೆ. ಎಸ್. ನಾಯ್ಕ ವಂದಿಸಿದರು. ಮುಖ್ಯ ಕಾರ್ಯನಿರ್ವಾಹಕ ಭಾರತಿ ನಾಯ್ಕ ನಿರ್ವಹಿಸಿದರು.
