ಸುದ್ದಿಬಿಂದು ಬ್ಯೂರೋ ವರದಿ
ಕಾರವಾರ: ಮಧ್ಯಪ್ರಾಚ್ಯದಲ್ಲಿ ನಡೆಯುತ್ತಿರುವ ಯುದ್ಧ ಪರಿಸ್ಥಿತಿಯ ನಡುವೆಯೂ ಯುಎಇಯಿಂದ ಬಿಟುಮಿನ್ (ಕಚ್ಚಾ ಡಾಂಬರ್) ಸಾಗಣೆ ಮಾಡಿದ್ದ ‘ಚೆಂಗ್ ಎಕ್ಸ್’ ಹೆಸರಿನ ವಾಣಿಜ್ಯ ಹಡಗು ಕಾರವಾರ ಬಂದರಿಗೆ ಯಶಸ್ವಿಯಾಗಿ ಆಗಮಿಸಿದೆ.
ಸುಮಾರು 5,500 ಟನ್ ಸಾಮರ್ಥ್ಯ ಹೊಂದಿರುವ ‘ಚೆಂಗ್ ಎಕ್ಸ್’ ಹಡಗುದಲ್ಲಿ ಒಟ್ಟು 3,100 ಟನ್ ಬಿಟುಮಿನ್ ಲೋಡ್ ಮಾಡಲಾಗಿದ್ದು, ಯುಎಇಯ ಕೋರ್ಪಕಾನ್ ಬಂದರಿನಿಂದ ಕಾರವಾರ ಬಂದರಿಗೆ ತಲುಪಿದೆ.ಮಧ್ಯಪ್ರಾಚ್ಯದಲ್ಲಿ ಉಂಟಾಗಿರುವ ಉದ್ವಿಗ್ನ ಪರಿಸ್ಥಿತಿಯ ಹಿನ್ನೆಲೆ, ಇರಾನ್ ತನ್ನ ಹಿಡಿತದಲ್ಲಿರುವ ಹರ್ಮೋಜ್ ಜಲಸಂಧಿಯಲ್ಲಿ ಹಡಗುಗಳ ಸಂಚಾರಕ್ಕೆ ನಿರ್ಬಂಧ ಹೇರಿದ ಹಿನ್ನೆಲೆಯಲ್ಲಿ ಸಾಗಾಣಿಕೆ ವ್ಯವಹಾರಗಳ ಮೇಲೆ ಪರಿಣಾಮ ಉಂಟಾಗಿತ್ತು. ಆದರೂ ಈ ನಿರ್ಬಂಧದ ನಡುವೆಯೇ ಯುಎಇಯಿಂದ ಹೊರಟಿದ್ದ ಈ ಹಡಗು ಸುರಕ್ಷಿತವಾಗಿ ಕಾರವಾರ ಬಂದರಿಗೆ ಆಗಮಿಸಿರುವುದು ಗಮನಾರ್ಹವಾಗಿದೆ.
ಫೆಬ್ರವರಿ 28ರಂದು ಅಮೆರಿಕಾ ಮತ್ತು ಇಸ್ರೇಲ್ ಪಡೆಗಳು ಇರಾನ್ ಮೇಲೆ ದಾಳಿ ನಡೆಸಿದ ನಂತರ ಮಧ್ಯಪ್ರಾಚ್ಯದಲ್ಲಿ ಉದ್ವಿಗ್ನತೆ ಹೆಚ್ಚಿತ್ತು. ಈ ಹಿನ್ನೆಲೆಯಲ್ಲಿ ಮಾರ್ಚ್ 3ರಂದು ಯುಎಇಯಿಂದ ಹೊರಟಿದ್ದ ‘ಚೆಂಗ್ ಎಕ್ಸ್’ ಹಡಗು ಇದೀಗ ಕಾರವಾರ ಬಂದರನ್ನು ತಲುಪಿದೆ.
ಇಂದು ಸಂಜೆ ಈ ಹಡಗು ಕಾರವಾರದಿಂದ ವಾಪಸ್ ಹೊರಡುವ ಸಾಧ್ಯತೆ ಇದ್ದು, ಮುಂದೆ ಎಲ್ಲಿಗೆ ಹೊರಡಲಿದೆ ಎಂಬುದು ಇನ್ನೂ ಖಚಿತವಾಗಿಲ್ಲ.ಎಂದು ಹಡಗಿನ ಸಿಬ್ಬಂದಿ ಓರ್ವರು ಮಾಹಿತಿ ನೀಡಿದ್ದಾರೆ.
ಇದನ್ನೂ ಓದಿ/ಬಾವಿಗೆ ಬಿದ್ದ ಚಿರತೆ: ಹಳಗಾ ಗ್ರಾಮದಲ್ಲಿ ಆತಂಕ – ರಕ್ಷಣೆಗೆ ಅರಣ್ಯ ಇಲಾಖೆಯ ಹರಸಾಹಸ
