ಹುಬ್ಬಳ್ಳಿ : ಜನ ಈಗ ಆನ್ಲೈನ್ ಶಾಪಿಂಗ್ ಮಾಡೋದನ್ನೆ ರೂಡಿ ಮಾಡಿಕೊಂಡಿದ್ದಾರೆ. ಅದನ್ನೇ ಆಸರೆಯಾಗಿಸಿಕೊಂಡು ಕೆಲವರು ಮೋಸ ಮಾಡುವ ಘಟನೆಗಳು ಕೂಡ ಹೆಚ್ಚಾಗುತ್ತಿವೆ. ಗ್ರಾಹಕರು ಆರ್ಡರ್ ಮಾಡುವ ವಸ್ತು ಒಂದಾದರೆ, ಅವರ ಕೈಗೆ ತಲುಪುವುದು ಬೇರೆ ವಸ್ತು ಆಗಿರುವ ಪ್ರಕರಣಗಳು ಅಲ್ಲಲ್ಲಿ ಕೇಳಿಬರುತ್ತಿವೆ. ಇಂತಹದೇ ಒಂದು ಘಟನೆ ಇತ್ತೀಚೆಗೆ ಬೆಳಕಿಗೆ ಬಂದಿದೆ.
ದಿನಕರ ಶೆಟ್ರೆ ನೀವು ಅಲ್ಲೆ ಇರಿ..ಕಾಂಗ್ರೆಸ್ ನಲ್ಲಿ ಜಾಗ ಇಲ್ಲ..ವಿಡಿಯೋ ನೋಡಲು ಇಲ್ಲಿ ಕ್ಲಿಕ್ ಮಾಡಿ
ಶಾರ್ಜಾದಲ್ಲಿ ವಾಸವಾಗಿರುವ ಹುಬ್ಬಳ್ಳಿಯ ಉದ್ಯಮಿಯೊಬ್ಬರು, ಪರಿಚಿತರಿಗೆ ಉಡುಗೊರೆಯಾಗಿ ನೀಡಲು Amazon ಮೂಲಕ ಕ್ಯಾಮರಾ ಆರ್ಡರ್ ಮಾಡಿದ್ದರು. ಆ ಪಾರ್ಸಲ್ ಹುಬ್ಬಳ್ಳಿಯಲ್ಲಿರುವ ಖಾಸಗಿ ಹೋಟೆಲ್ ವಿಳಾಸಕ್ಕೆ ತಲುಪಿದ್ದು, ತೆರೆಯುವ ವೇಳೆ ಕ್ಯಾಮರಾ ಬದಲು ವಾಷಿಂಗ್ ಪೌಡರ್ ಪ್ಯಾಕೆಟ್ಗಳು ಪತ್ತೆಯಾಗಿವೆ ಎಂದು ಅವರು ದೂರಿದ್ದಾರೆ.
ಸುಮಾರು 60 ಸಾವಿರ ರೂ. ಮೌಲ್ಯದ ಕ್ಯಾಮರಾವನ್ನು ಆರ್ಡರ್ ಮಾಡಿದ್ದಾಗಿ ತಿಳಿಸಿರುವ ಉದ್ಯಮಿ, ಪ್ಯಾಕೆಟ್ ತೆರೆದಾಗ ನಿರೀಕ್ಷಿಸಿದ್ದ ವಸ್ತು ಇಲ್ಲದೆ ಬೇರೆ ವಸ್ತು ಬಂದಿರುವುದರಿಂದ ತೀವ್ರ ಆಘಾತವಾಗಿದೆ ಎಂದು ಹೇಳಿದ್ದಾರೆ. ಈ ಸಂಬಂಧ ಸಂಸ್ಥೆಗೆ ದೂರು ನೀಡಿದರೂ, ತಮಗೆ ಸಮರ್ಪಕ ಸ್ಪಂದನೆ ಸಿಕ್ಕಿಲ್ಲ ಎಂಬ ಅಸಮಾಧಾನವನ್ನೂ ವ್ಯಕ್ತಪಡಿಸಿದ್ದಾರೆ.
ಇದಕ್ಕೂ ಮುನ್ನ ವಿದೇಶದಲ್ಲಿರುವಾಗಲೂ ಅವರು ಹಲವು ಬಾರಿ ಆನ್ಲೈನ್ ಮೂಲಕ ಖರೀದಿ ಮಾಡಿದ್ದು, ಅಲ್ಲಿಯವರೆಗೆ ಈ ರೀತಿಯ ಅನುಭವ ಎದುರಾಗಿರಲಿಲ್ಲ ಎಂದು ಹೇಳಿದ್ದಾರೆ. ಈ ಬಾರಿ ಸ್ನೇಹಿತನಿಗೆ ಉಡುಗೊರೆಯಾಗಿ ಕ್ಯಾಮರಾ ತರಿಸಲು ಯತ್ನಿಸಿದಾಗಲೇ ಈ ಸಮಸ್ಯೆ ಎದುರಾಗಿದೆ ಎಂದು ತಿಳಿದುಬಂದಿದೆ.
ಪಾರ್ಸಲ್ ತೆರೆಯುವ ದೃಶ್ಯವನ್ನೇ ವಿಡಿಯೋದಲ್ಲಿ ದಾಖಲಿಸಿಕೊಂಡಿರುವುದಾಗಿ ಅವರು ಹೇಳಿದ್ದು, ಇದು ವಂಚನೆಗೆ ಸಾಕ್ಷಿಯಾಗಿದೆ ಎಂದು ಆರೋಪಿಸಿದ್ದಾರೆ. ಈ ಘಟನೆ ಆನ್ಲೈನ್ ಶಾಪಿಂಗ್ ಮಾಡುವವರು ಇನ್ನಷ್ಟು ಎಚ್ಚರಿಕೆಯಿಂದಿರಬೇಕು ಎಂಬ ಸಂದೇಶವನ್ನು ಮತ್ತೆ ನೆನಪಿಸುತ್ತಿದೆ.
