ಸುದ್ದಿಬಿಂದು ಬ್ಯೂರೋ ವರದಿ
ಕುಮಟಾ : ಕುಮಟಾ-ಹೊನ್ನಾವರ ವಿಧಾನಸಭಾ ಕ್ಷೇತ್ರದಲ್ಲಿ ಮಾತ್ರ ಚುನಾವಣಾ ಪೂರ್ವದಲ್ಲೇ ಕಾಂಗ್ರೆಸ್ಸಿನಿಂದ ಯಾರು ಅಭ್ಯರ್ಥಿಯಾಗಲಿದ್ದಾರೆ ಎಂಬ ಚರ್ಚೆ ಆಗಾಗ ಮುನ್ನೆಲೆಗೆ ಬರುತ್ತಿದ್ದು, ಈ ನಡುವೆ ಈಗಾಗಲೇ ಕ್ಷೇತ್ರದ ಬಗ್ಗೆ ಸೂಕ್ಷ್ಮತೆ ಅರಿಯದೆ “ರೆಡಿ”ಯಾಗಿ ಬಂದ ರಾಜಕಾರಣಿ “ತಾನು ಲೋಕಲ್ ರಾಜಕಾರಣಿ ಅಲ್ಲ, ನಾನೇ ಬೇರೆ-ನನ್ ಸ್ಟೆಲೇ ಬೇರೆ” ಎಂದು ಹೇಳಿಕೊಂಡು ತಿರುಗುತ್ತಿದ್ದಾರಂತೆ! ಇವರು ಲೋಕಲ್ ರಾಜಕಾರಣಿ ಅಲ್ಲದಿದ್ದರೂ ಮತದಾರರು ಪಕ್ಕಾ ಲೋಕಲ್ ಅಲ್ಲವೇ? ಇದನ್ನು ರೆಡಿ ಅಭ್ಯರ್ಥಿ ಮರೆಯಬಾರದಲ್ಲವೇ?
ಕುಮಟಾ-ಹೊನ್ನಾವರ ಕ್ಷೇತ್ರದ ಮತದಾರರು ತಮ್ಮ ಕ್ಷೇತ್ರದ ಸಮಸ್ಯೆಗಳು, ಅಭಿವೃದ್ಧಿ ವಿಚಾರಗಳು ಹಾಗೂ ತಮ್ಮೊಂದಿಗೆ ನಿರಂತರವಾಗಿ ಸಂಪರ್ಕದಲ್ಲಿರುವ ನಾಯಕರನ್ನು ಗಮನದಲ್ಲಿಟ್ಟುಕೊಂಡೇ ಪ್ರತಿ ಚುನಾವಣೆಯಲ್ಲಿ ನಿರ್ಧಾರ ಕೈಗೊಳ್ಳುತ್ತಾರೆ ಎಂಬುದು ಕುಮಟಾ ಕ್ಷೇತ್ರದ ರಾಜಕೀಯ ವಾಸ್ತವ್ಯ. ಹೀಗಾಗಿ ಹೊರಗಿನಿಂದ ಬಂದು ಅಭ್ಯರ್ಥಿಯಾಗಲು ಮುಂದಾಗುವವರು ಕ್ಷೇತ್ರದ ಜನರೊಂದಿಗೆ ಯಾವ ರೀತಿಯ ಸಂಪರ್ಕ ಹೊಂದಿದ್ದಾರೆ? ಸ್ಥಳೀಯ ಸಮಸ್ಯೆಗಳ ಬಗ್ಗೆ ಅವರ ನಿಲುವೇನು? ಪಕ್ಷದ ಕಾರ್ಯಕರ್ತರೊಂದಿಗೆ ಅವರ ಹೊಂದಾಣಿಕೆ ಹೇಗಿದೆ? ಎಂಬ ಪ್ರಶ್ನೆಗಳು ರಾಜಕೀಯದಲ್ಲಿ ಎದುರಾಗುವುದು ಸಹಜ.
ಮಾಧ್ಯಮ ಇವರನ್ನು ಹಾಡಿ ಹೊಗಳಬೇಕೇ?
ಇವರಷ್ಟಕ್ಕೆ ಇವರು ಚುನಾವಣೆಗೆಂದು ಬಾಸಿಂಗ ಕಟ್ಟಿಕೊಂಡು “ರೆಡಿ”ಯಾಗಿ ಬಂದ ಮಾತ್ರಕ್ಕೆ ಮಾಧ್ಯಮಗಳು ಇವರನ್ನು ಹಾಡಿ ಹೋಗಳಬೇಕೇ? ಮಾಧ್ಯಮದವರಿಗೂ ಅವರದೇ ಆದ ಜವಾಬ್ದಾರಿ ಇದೆ. ಯಾರೋ ಬಂದು ಕ್ಷೇತ್ರದಲ್ಲಿ ತಾವೇ ಅಭ್ಯರ್ಥಿ ಎಂದು ತಕತೈ ಎಂದು ಕುಣಿದ ಮಾತ್ರಕ್ಕೆ ಅಂತವರನ್ನು ಹಾಡಿ ಹೊಗಳಬೇಕಂತಿಲ್ಲ. ಕ್ಷೇತ್ರದ ಮತದಾರರ ನಾಡಿಮಿಡಿತ ಹೇಗಿದೆ? ಹಿಂದೆ ಬಂದು ಹೋದವರು ಏನೆಲ್ಲಾ ಮಾಡಿದ್ದಾರೆ? ಅಂತವರಿಗೆ ಇಲ್ಲಿನ ಮತದಾರರು ಯಾವ ರೀತಿ ಉತ್ತರ ಕೊಟ್ಟಿದ್ದಾರೆ? ರಾಜಕಾರಣಿಯ ಹೇಳಿಕೆಗಳು ಹಾಗೂ ರಾಜಕೀಯ ಬೆಳವಣಿಗೆಗಳನ್ನು ಜನರಿಗೆ ಮುಟ್ಟಿಸುವುದು ಕೂಡ ಮಾಧ್ಯಮಗಳ ಕೆಲಸ. ಮಾಧ್ಯಮಗಳು ಏನೇ ಬರೆಯಲಿ, ಹೊಗಳಲಿ… ಆದರೆ ಅಂತಿಮವಾಗಿ ಅಭ್ಯರ್ಥಿಯನ್ನು ಒಪ್ಪಿಕೊಳ್ಳುವ ಅಥವಾ ತಿರಸ್ಕರಿಸುವ ಅಧಿಕಾರ ಮಾತ್ರ ಮತದಾರರ ಕೈಯಲ್ಲೇ ಇದೆ.
