ಸುದ್ದಿಬಿಂದು ಬ್ಯೂರೋ ವರದಿ
ಹಳಿಯಾಳ: ಪಟ್ಟಣದ ಹುಲ್ಲಟ್ಟಿ ಪ್ರದೇಶದಲ್ಲಿರುವ ಇಐಡಿ ಪ್ಯಾರಿ ಸಕ್ಕರೆ ಕಾರ್ಖಾನೆ ಆವರಣ ಹಾಗೂ ಮುಂಭಾಗದ ಪ್ರದೇಶದಲ್ಲಿ ಮಾನವ ಸ್ನೇಹಿ ಮತ್ತು ಸಾಕು ಶ್ವಾನಗಳನ್ನು ಹಿಡಿಯಲಾಗುತ್ತಿದೆ ಎಂಬ ಆರೋಪ ಕೇಳಿಬಂದಿದ್ದು, ಘಟನೆ ಇದೀಗ ತೀವ್ರ ಚರ್ಚೆಗೆ ಗ್ರಾಸವಾಗಿದೆ. ಈ ಹಿನ್ನೆಲೆಯಲ್ಲಿ ಪ್ರಾಣಿ ದಯಾ ಕಾರ್ಯಕರ್ತರು ಹಾಗೂ ರೈತ ಸಂಘಟನೆಗಳು ಕಾರ್ಖಾನೆ ಆಡಳಿತದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಕಾರ್ಖಾನೆ ಅಧಿಕಾರಿಗಳ ಸೂಚನೆಯ ಮೇರೆಗೆ ಲೋಕಾಪುರದಿಂದ ಸುಮಾರು 25ರಿಂದ 30 ಮಂದಿಯ ತಂಡವೊಂದು ಆಗಮಿಸಿ ಶ್ವಾನಗಳನ್ನು ಹಿಡಿಯುವ ಕಾರ್ಯಾಚರಣೆ ನಡೆಸುತ್ತಿತ್ತು ಎಂದು ಸ್ಥಳೀಯರು ಹಾಗೂ ಪ್ರಾಣಿ ದಯಾ ಕಾರ್ಯಕರ್ತರು ಆರೋಪಿಸಿದ್ದಾರೆ.

30ಕ್ಕೂ ಅಧಿಕ ಶ್ವಾನಗಳನ್ನು ಹಿಡಿದ ಆರೋಪ
ಸೆ.19ರಿಂದ ಶ್ವಾನಗಳನ್ನು ಹಿಡಿಯುವ ಕಾರ್ಯಾಚರಣೆ ಆರಂಭವಾಗಿದ್ದು, ಶನಿವಾರ ಒಂದೇ ದಿನ ಸುಮಾರು 30ರಿಂದ 40 ಶ್ವಾನಗಳನ್ನು ಹಿಡಿದು ಭಾಗವತಿ ಹಾಗೂ ಧಾರವಾಡ ರಸ್ತೆಯ ಸಮೀಪದ ಕಾಡಂಚಿನ ಪ್ರದೇಶಕ್ಕೆ ಬಿಡಲಾಗಿದೆ ಎಂಬ ದೂರುಗಳು ಕೇಳಿಬಂದಿವೆ. ಈ ವಿಚಾರ ತಿಳಿಯುತ್ತಿದ್ದಂತೆ ಪ್ರಾಣಿ ದಯಾ ಕಾರ್ಯಕರ್ತರು ನಿನ್ನೆ ಬೆಳಗ್ಗೆಯಿಂದಲೇ ಸ್ಥಳಕ್ಕೆ ತೆರಳಿ ಪರಿಶೀಲನೆ ನಡೆಸಿದ್ದಾರೆ. ಈ ವೇಳೆ ಶ್ವಾನಗಳನ್ನು ಹಿಡಿಯಲು ಬಳಸಲಾಗುತ್ತಿದೆ ಎನ್ನಲಾದ ವಾಹನ ಹಾಗೂ ವಿವಿಧ ಸಾಮಗ್ರಿಗಳೊಂದಿಗೆ ತಂಡವೊಂದು ಕಾರ್ಖಾನೆ ಆವರಣದಲ್ಲಿ ಇರುವುದನ್ನು ಪತ್ತೆಹಚ್ಚಲಾಗಿದೆ ಎಂದು ಕಾರ್ಯಕರ್ತರು ತಿಳಿಸಿದ್ದಾರೆ.

ವಾಹನವನ್ನು ಪರಿಶೀಲಿಸಿದ ಸಂದರ್ಭದಲ್ಲಿ ಐದರಿಂದ ಆರು ಶ್ವಾನಗಳು ಅರೆಪ್ರಜ್ಞಾವಸ್ಥೆಯಲ್ಲಿದ್ದವು ಎನ್ನಲಾಗಿದ್ದು, ಅವುಗಳನ್ನು ಕಾರ್ಯಕರ್ತರು ರಕ್ಷಿಸಿದ್ದಾರೆ ಎಂದು ತಿಳಿದುಬಂದಿದೆ.

ವಿಚಾರಣೆ ವೇಳೆ ಸ್ಥಳದಿಂದ ಪರಾರಿ‌
ಶ್ವಾನಗಳ ನಾಪತ್ತೆ ಕುರಿತು ಮಾಹಿತಿ ಸಂಗ್ರಹಿಸುತ್ತಿದ್ದ ಪ್ರಾಣಿ ದಯಾ ಕಾರ್ಯಕರ್ತರಿಗೆ ಕಾರ್ಖಾನೆ ಆವರಣ ಮತ್ತು ಮುಂಭಾಗದಲ್ಲಿ ಶ್ವಾನಗಳನ್ನು ಹಿಡಿಯುತ್ತಿದ್ದ ತಂಡ ಕಂಡುಬಂದಿದೆ. ತಂಡದ ಸದಸ್ಯರನ್ನು ವಿಚಾರಿಸಿದಾಗ, ತಾವು ಲೋಕಾಪುರ ಮೂಲದವರಾಗಿದ್ದು, ಕಾರ್ಖಾನೆ ಆಡಳಿತದ ಕರೆಯ ಮೇರೆಗೆ ಬಂದಿರುವುದಾಗಿ ತಿಳಿಸಿದ್ದಾರೆ ಎನ್ನಲಾಗಿದೆ.
ಸೆ.19ರಿಂದ ಈವರೆಗೆ 30ಕ್ಕೂ ಅಧಿಕ ಶ್ವಾನಗಳನ್ನು ಹಿಡಿದಿರುವುದಾಗಿ ತಂಡದವರು ತಿಳಿಸಿದ್ದಾರೆನ್ನಲಾಗಿದೆ. ಹೆಚ್ಚಿನ ಮಾಹಿತಿ ಪಡೆಯಲು ಮುಂದಾದ ಸಂದರ್ಭದಲ್ಲಿ ತಂಡದವರು ಸ್ಥಳದಿಂದ ಪರಾರಿಯಾಗಿದ್ದಾರೆ ಎನ್ನಲಾಗಿದೆ..

ಕಾಡಿಗೆ ಬಿಡುವುದರಿಂದ ಅಪಾಯದ ಆತಂಕ
ನಾಡಿನ ಪ್ರದೇಶಗಳಲ್ಲಿ ವಾಸಿಸುವ ಶ್ವಾನಗಳನ್ನು ಏಕಾಏಕಿ ಅರಣ್ಯ ಅಥವಾ ನಿರ್ಜನ ಪ್ರದೇಶಗಳಿಗೆ ಬಿಡುವುದರಿಂದ ಅವು ವನ್ಯಪ್ರಾಣಿಗಳ ದಾಳಿಗೆ ತುತ್ತಾಗುವ ಸಾಧ್ಯತೆಯಿದೆ. ಅಲ್ಲದೆ, ರೋಗ ಹರಡುವಿಕೆ ಸೇರಿದಂತೆ ಪರಿಸರ ಸಂಬಂಧಿತ ಸಮಸ್ಯೆಗಳಿಗೂ ಕಾರಣವಾಗಬಹುದು ಎಂದು ಪ್ರಾಣಿ ದಯಾ ಕಾರ್ಯಕರ್ತರು ಆತಂಕ ವ್ಯಕ್ತಪಡಿಸಿದ್ದಾರೆ.

ಶ್ವಾನಗಳನ್ನು ಹಿಡಿಯಲು ಸ್ಥಳೀಯ ಸಂಸ್ಥೆ ಅಥವಾ ಪಶುಸಂಗೋಪನಾ ಇಲಾಖೆಯಿಂದ ಅನುಮತಿ ಪಡೆಯಲಾಗಿತ್ತೇ? ಶ್ವಾನಗಳನ್ನು ಕಾಡಂಚಿನ ಪ್ರದೇಶಗಳಿಗೆ ಬಿಡಲು ಸೂಚನೆ ನೀಡಿದವರು ಯಾರು? ಕಾರ್ಯಾಚರಣೆಗೆ ಬಳಸಲಾದ ತಂಡಕ್ಕೆ ಯಾವ ಸಂಸ್ಥೆಯಿಂದ ಅಧಿಕಾರ ನೀಡಲಾಗಿತ್ತು? ಎಂಬ ಹಲವು ಪ್ರಶ್ನೆಗಳಿಗೆ ಅಧಿಕಾರಿಗಳು ಸ್ಪಷ್ಟನೆ ನೀಡಬೇಕೆಂದು ಆಗ್ರಹಿಸಲಾಗಿದೆ.

ರೈತ ಮುಖಂಡರಿಂದ ಪ್ರತಿಭಟನೆ
ವಿಷಯ ತಿಳಿಯುತ್ತಿದ್ದಂತೆ ರೈತ ಮುಖಂಡರು ಸ್ಥಳಕ್ಕೆ ಆಗಮಿಸಿ ಪ್ರತಿಭಟನೆ ನಡೆಸಿದರು. ರೈತ ಮುಖಂಡ ನಾಗೇಂದ್ರ ಜಿವೋಜಿ ಮಾತನಾಡಿ, “ಕಾರ್ಖಾನೆ ಆವರಣ ಹಾಗೂ ಮುಂಭಾಗದಲ್ಲಿ ಶ್ವಾನಗಳನ್ನು ಹಿಡಿಯುತ್ತಿರುವುದು ಕಂಡುಬಂದಿದೆ. ನಾಡಿನಲ್ಲಿ ವಾಸಿಸುವ ಪ್ರಾಣಿಗಳನ್ನು ಕಾಡಿಗೆ ಬಿಡುವುದು ಗಂಭೀರ ವಿಷಯ. ಇದರ ಹಿಂದೆ ಯಾರಿದ್ದಾರೆ ಎಂಬುದನ್ನು ಸಂಪೂರ್ಣವಾಗಿ ತನಿಖೆ ನಡೆಸಬೇಕು. ತಪ್ಪಿತಸ್ಥರು ಕಂಡುಬಂದರೆ ಕಾನೂನು ಕ್ರಮ ಕೈಗೊಳ್ಳಬೇಕು” ಎಂದು ಒತ್ತಾಯಿಸಿದರು.

ಪ್ರಾಣಿದಯಾ ಕಾರ್ಯಕರ್ತ ಹಾಗೂ ಪ್ರಾಣಿಗಳ ಹಕ್ಕುಗಳ ಹೋರಾಟಗಾರ ಯೋಗರಾಜ ಎಸ್.ಕೆ. ಮಾತನಾಡಿ, ಶ್ವಾನಗಳನ್ನು ಹಿಡಿಯುತ್ತಿರುವ ಮಾಹಿತಿ ದೊರೆತ ತಕ್ಷಣ ಸ್ಥಳಕ್ಕೆ ತೆರಳಿ ಕಾರ್ಯಾಚರಣೆಯನ್ನು ತಡೆದು, ಸಂಬಂಧಪಟ್ಟ ಅಧಿಕಾರಿಗಳಿಗೆ ಮಾಹಿತಿ ನೀಡಿ ದೂರು ಸಲ್ಲಿಸಿರುವುದಾಗಿ ತಿಳಿಸಿದರು.
ನಿಯಮಾನುಸಾರವೇ ಕಾರ್ಯಾಚರಣೆ ನಡೆದಿತ್ತೇ?
Animal Birth Control Rules, 2023 ಅನ್ನು ಕೇಂದ್ರ ಸರ್ಕಾರ 2023ರ ಮಾರ್ಚ್ 10ರಂದು ಅಧಿಸೂಚಿಸಿದೆ. ನಿಯಮಗಳ ಪ್ರಕಾರ ಬೀದಿ ಶ್ವಾನಗಳ ಸಂತಾನಹರಣ ಮತ್ತು ಲಸಿಕಾಕರಣ ಕಾರ್ಯಕ್ರಮವನ್ನು ಸ್ಥಳೀಯ ಸಂಸ್ಥೆಗಳು ಅಥವಾ ನಿಯಮಾನುಸಾರ ಮಾನ್ಯತೆ ಪಡೆದ ಸಂಸ್ಥೆಗಳ ಮೂಲಕ ನಡೆಸುವ ವ್ಯವಸ್ಥೆ ಇದೆ. Animal Welfare Board of India ಕೂಡ ABC ಕಾರ್ಯಕ್ರಮಗಳಿಗೆ ಸಂಬಂಧಿಸಿದಂತೆ ಮಾನ್ಯತೆ ಹಾಗೂ ಯೋಜನಾ ಅನುಮೋದನೆಯ ಅಗತ್ಯವನ್ನು ಸ್ಪಷ್ಟಪಡಿಸಿದೆ. ಹೀಗಾಗಿ ಹಳಿಯಾಳದಲ್ಲಿ ನಡೆದಿರುವುದಾಗಿ ಆರೋಪಿಸಲಾದ ಶ್ವಾನ ಹಿಡಿಯುವ ಕಾರ್ಯಾಚರಣೆಗೆ ಸಂಬಂಧಿಸಿದಂತೆ ಅಗತ್ಯ ಅನುಮತಿ, ಮಾನ್ಯತೆ ಹಾಗೂ ನಿಯಮಾನುಸಾರ ಕ್ರಮಗಳನ್ನು ಪಾಲಿಸಲಾಗಿತ್ತೇ ಎಂಬುದನ್ನು ಅಧಿಕಾರಿಗಳು ಪರಿಶೀಲಿಸಬೇಕಾಗಿದೆ.

ಶ್ವಾನಗಳನ್ನು ಹಿಡಿದ ತಂಡ, ಬಳಸಲಾದ ವಾಹನ, ಕಾರ್ಯಾಚರಣೆಗೆ ನೀಡಲಾದ ಸೂಚನೆ ಹಾಗೂ ಶ್ವಾನಗಳನ್ನು ಎಲ್ಲಿಗೆ ಸ್ಥಳಾಂತರಿಸಲಾಗಿದೆ ಎಂಬುದರ ಕುರಿತು ಸಮಗ್ರ ತನಿಖೆ ನಡೆಸಿ ವಾಸ್ತವಾಂಶವನ್ನು ಬಹಿರಂಗಪಡಿಸಬೇಕು ಎಂದು ಪ್ರಾಣಿ ದಯಾ ಕಾರ್ಯಕರ್ತರು ಮತ್ತು ರೈತ ಸಂಘಟನೆಗಳು ಒತ್ತಾಯಿಸಿವೆ.