ಸುದ್ದಿಬಿಂದು ಬ್ಯೂರೋ ವರದಿ
ಕೇವಲ ಒಂದು ಎಕರೆ ಜಮೀನಿನ ವಿವಾದಕ್ಕೆ ಸಂಬಂಧಿಸಿದಂತೆ ಮಹಿಳೆಯೊಬ್ಬರ ಮೇಲೆ ಬುಲೆರೋ ವಾಹನ ಹರಿಸಿ ಕೊಲೆ ಮಾಡಲು ಯತ್ನಿಸಿದ ಘಟನೆ ಬಾಗಲಕೋಟೆ ಜಿಲ್ಲೆಯ ಇಳಕಲ್ ತಾಲ್ಲೂಕಿನ ಕಂದಗಲ್ ಗ್ರಾಮದಲ್ಲಿ ನಡೆದಿದೆ.
ಘಟನೆಯಲ್ಲಿ ಗಾಯಗೊಂಡಿರುವ ಮಂಗಳಾದೇವಿ ಅವರನ್ನು ಬಾಗಲಕೋಟೆಯ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಆರೋಪಿಯಾಗಿರುವ ಚನ್ನಪ್ಪಗೌಡ ಘಟನೆ ಬಳಿಕ ನಾಪತ್ತೆಯಾಗಿದ್ದಾನೆ. ಆತನ ಪತ್ತೆಗಾಗಿ ಪೊಲೀಸರು ಶೋಧ ಕಾರ್ಯ ಕೈಗೊಂಡಿದ್ದಾರೆ.
20 ವರ್ಷಗಳಿಂದ ಜಮೀನು ಒತ್ತುವರಿ ಆರೋಪ
ಗಾಯಾಳು ಮಂಗಳಾದೇವಿ ಅವರ ಕುಟುಂಬ ಹಾಗೂ ಆರೋಪಿ ಚನ್ನಪ್ಪಗೌಡ ಅವರ ಕುಟುಂಬದವರು ಸಂಬಂಧಿಕರಾಗಿದ್ದು, ಎರಡೂ ಕುಟುಂಬಗಳು ತಲಾ ಸುಮಾರು 80 ಎಕರೆ ಜಮೀನು ಹೊಂದಿವೆ ಎನ್ನಲಾಗಿದೆ. ಮಂಗಳಾದೇವಿ ಅವರ ಕುಟುಂಬಕ್ಕೆ ಸೇರಿದ್ದ ಒಂದು ಎಕರೆ ಜಮೀನನ್ನು ಚನ್ನಪ್ಪಗೌಡ ಕಳೆದ 20 ವರ್ಷಗಳಿಂದ ಒತ್ತುವರಿ ಮಾಡಿಕೊಂಡಿದ್ದಾನೆ ಎಂಬ ಆರೋಪ ಕೇಳಿಬಂದಿದೆ.
ಮಂಗಳಾದೇವಿ ಅವರ ಪತಿ ಆರು ತಿಂಗಳ ಹಿಂದೆ ಮೃತಪಟ್ಟಿದ್ದರು. ಜಮೀನಿನ ವಿವಾದಕ್ಕೆ ಸಂಬಂಧಿಸಿದಂತೆ ಮಂಗಳಾದೇವಿ ಅವರು ಕಳೆದ ಸೆಪ್ಟೆಂಬರ್ 24ರಂದು ಜಮೀನಿನ ಸರ್ವೆ ಮಾಡಿಸಿದ್ದರು. ಆದರೆ, ಸರ್ವೆ ನಡೆದ ಬಳಿಕವೂ ವಿವಾದಿತ ಜಮೀನಿನಲ್ಲಿ ಚನ್ನಪ್ಪಗೌಡ ಬಿತ್ತನೆ ಮಾಡಿದ್ದ ಎನ್ನಲಾಗಿದೆ.
ಜಮೀನಿನಲ್ಲಿ ಮತ್ತೆ ಉಳುಮೆ ಮಾಡಿದ್ದಕ್ಕೆ ಆಕ್ರೋಶ
ಒತ್ತುವರಿಯಾಗಿದೆ ಎನ್ನಲಾದ ಜಮೀನಿನಲ್ಲಿ ಮಂಗಳಾದೇವಿ ಅವರ ಕುಟುಂಬದವರು ಮತ್ತೆ ಉಳುಮೆ ಮಾಡಿದ್ದರು. ಇದರಿಂದ ಆಕ್ರೋಶಗೊಂಡಿದ್ದ ಚನ್ನಪ್ಪಗೌಡ, ವಿವಾದಿತ ಎರಡೂವರೆ ಎಕರೆ ಜಮೀನಿನ ವಿಚಾರವಾಗಿ ಮಂಗಳಾದೇವಿ ಅವರ ಮೇಲೆ ಬುಲೆರೋ ವಾಹನ ಹರಿಸಿ ಕೊಲೆಗೆ ಯತ್ನಿಸಿದ್ದಾನೆ ಎಂದು ಆರೋಪಿಸಲಾಗಿದೆ.
ಘಟನೆ ಬಳಿಕ ಆರೋಪಿ ಚನ್ನಪ್ಪಗೌಡ ನಾಪತ್ತೆಯಾಗಿದ್ದು, ಆತನಿಗಾಗಿ ಪೊಲೀಸರು ಹುಡುಕಾಟ ನಡೆಸುತ್ತಿದ್ದಾರೆ. ಈ ಸಂಬಂಧ ಇಳಕಲ್ ಗ್ರಾಮೀಣ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಪ್ರಕರಣ ದಾಖಲಾಗಿದೆ.
ಆಸ್ಪತ್ರೆಗೆ ಸಚಿವರು, ಎಸ್ಪಿ ಭೇಟಿ
ಗಾಯಾಳು ಮಂಗಳಾದೇವಿ ಅವರು ಬಾಗಲಕೋಟೆಯ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಆಸ್ಪತ್ರೆಗೆ ಭೇಟಿ ನೀಡಿದ ಉಸ್ತುವಾರಿ ಸಚಿವ ಕಾಶಪ್ಪನವರ್ ಅವರು ಮಂಗಳಾದೇವಿ ಅವರ ಆರೋಗ್ಯ ವಿಚಾರಿಸಿ, ಕುಟುಂಬಸ್ಥರಿಗೆ ಧೈರ್ಯ ತುಂಬಿದರು. ಇನ್ನು, ಪೊಲೀಸ್ ವರಿಷ್ಠಾಧಿಕಾರಿ ಸಿದ್ದಾರ್ಥ ಗೋಯಲ್ ಅವರು ಘಟನಾ ಸ್ಥಳ ಹಾಗೂ ಆಸ್ಪತ್ರೆಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.
ಐವರು ಸಹೋದರರ ಕುಟುಂಬದಲ್ಲಿ ಜಮೀನು ಕಲಹ
ಮಂಗಳಾದೇವಿ ಅವರ ಪತಿ ಹಾಗೂ ಆರೋಪಿ ಚನ್ನಪ್ಪಗೌಡ ಸೇರಿದಂತೆ ಒಟ್ಟು ಐವರು ಸಹೋದರರ ಕುಟುಂಬದಲ್ಲಿ ಜಮೀನು ಹಂಚಿಕೆಯಾಗಿತ್ತು. ಐವರು ಸಹೋದರರಿಗೂ ತಲಾ ಸುಮಾರು 80 ಎಕರೆ ಜಮೀನು ಹಂಚಿಕೆಯಾಗಿದ್ದರೂ, ಕೇವಲ ಒಂದು ಎಕರೆ ಜಮೀನಿನ ವಿಚಾರವಾಗಿ ವಿವಾದ ತೀವ್ರಗೊಂಡು ಮಹಿಳೆಯ ಮೇಲೆ ಹಲ್ಲೆ ಹಾಗೂ ಕೊಲೆ ಯತ್ನದ ಆರೋಪಕ್ಕೆ ಕಾರಣವಾಗಿದೆ.ಜಮೀನು ವಿವಾದಕ್ಕೆ ಸಂಬಂಧಿಸಿದ ಈ ಘಟನೆ ಗ್ರಾಮದಲ್ಲಿ ಆತಂಕ ಮೂಡಿಸಿದ್ದು, ಆರೋಪಿಯ ಬಂಧನಕ್ಕಾಗಿ ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.
ಇದನ್ನೂ ಓದಿ/ ಕುಮಟಾ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷರಾಗಿ ಭುವನ್ ಭಾಗ್ವತ್ ಮುಂದುವರಿಕೆಗೆ ಹೆಚ್ಚಿದ ಬೆಂಬಲ!
