ಸುದ್ದಿಬಿಂದು ಬ್ಯೂರೋ ವರದಿ
ಕುಮಟಾ : ಕುಮಟಾ-ಹೊನ್ನಾವರ ವಿಧಾನಸಭಾ ಕ್ಷೇತ್ರದ ಕಾಂಗ್ರೆಸ್ ರಾಜಕೀಯದಲ್ಲಿ ಚುನಾವಣೆಗೆ ವರ್ಷ ಇರುವಾಗಲೇ ಎಂ ಎಲ್‌ ಎ ಟಿಕೆಟಿಗಾಗಿ ಕೆಲವರು ಸಮಾಜ ಸೇವೆ, ಸಾರ್ವಜನಿಕ ಕಾರ್ಯಕ್ರಮಗಳ ಮೂಲಕ ಕ್ಷೇತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಈ ನಡುವೆ ಕುಮಟಾ ಕ್ಷೇತ್ರದಲ್ಲಿ ಹಿಂದೆ ನಡೆದ ವಿಧಾನಸಭಾ ಚುನಾವಣೆಗಳಲ್ಲಿ ತಾನೇ ಅಭ್ಯರ್ಥಿ ಎಂದು ಬಿ ಫಾರ್ಮ್ ಕೈಯಲ್ಲೇ ಇದೆ ಎಂದು ಹೇಳಿಕೊಂಡವರು ಇಂದು ಎಲ್ಲಿದ್ದಾರೆ ಎನ್ನುವುದನ್ನು ಕುಮಟಾ ಕ್ಷೇತ್ರದ ಜನ ಚುನಾವಣಾ ಪೂರ್ವದಲ್ಲಿ ಮತ್ತೆ ನೆನಪಿಸಿಕೊಳ್ಳುವಂತಾಗಿದೆ.

ಹಿಂದೆ ಕುಮಟಾ ಹಾಗೂ ಉತ್ತರ ಕನ್ನಡದ ರಾಜಕೀಯ ಅಖಾಡದಲ್ಲಿ ಇದೇ ರೀತಿಯ ಸದ್ದು ಮಾಡಿ ನಂತರ ರಾಜಕೀಯವಾಗಿ ನಿರೀಕ್ಷಿತ ಪ್ರಭಾವ ಉಳಿಸಿಕೊಳ್ಳಲು ಸಾಧ್ಯವಾಗದ ನಾಯಕರ ಹಾದಿಯಲ್ಲೇ ಈ ಬಾರೀ ಸಹ ಕ್ಷೇತ್ರದ ಬಗ್ಗೆ “ಸೂಕ್ಷ್ಮ” ವಾಗಿ ತಿಳಿಯದೆ ತಾನು “ರೆಡಿʼ ಎಂದು ಬಂದು ಮಿನಿ ವಿಧಾನಸೌಧ ಬಳಿ ನೆಲಸಿದ ಮಾತ್ರಕ್ಕೆ ರಾಜ್ಯದ ವಿಧಾನಸೌಧ ಮೂರನೆ ಮಹಡಿ ಏರಬಹುದು ಎಂದು ಕನಸು ಕಂಡವರು ಹಿಂದಿನವರಂತೆ ಹಣ ಚೆಲ್ಲಿ ಖಾಲಿ ಕೈಯಲ್ಲಿ ಮರಳಬಹುದೇ ಎಂದು ಕ್ಷೇತ್ರದ ಬುದ್ಧಿವಂತ ಮತದಾರರು ವ್ಯಂಗ್ಯವಾಡುತ್ತಿದ್ದಾರೆ.

ಧಾಮ್‌ ಧೂಮ್ ರಾಜಕೀಯ… ಮುಂದಿನ ಹೆಜ್ಜೆ ಏನು?
ಕುಮಟಾ ಕ್ಷೇತ್ರಕ್ಕೆ ಹೊಸದಾಗಿ ಕಾಲಿಡುವವರು ಆರಂಭದಲ್ಲಿ ಕಾರ್ಯಕ್ರಮಗಳು, ಜನಸಂಪರ್ಕ, ಸಾಮಾಜಿಕ ಚಟುವಟಿಕೆಗಳು ಹಾಗೂ ವಿವಿಧ ಆಶ್ವಾಸನೆಗಳ ಮೂಲಕ ತಮ್ಮದೇ ರಾಜಕೀಯ ವಲಯ ನಿರ್ಮಿಸಿಕೊಳ್ಳುವುದು ಹೊಸದೇನಲ್ಲ. ಈ ಹಿಂದೆ ಕಾಂಗ್ರಸ್ಸಿನಿಂದ ದಿ. ಯಶೋಧರ ನಾಯ್ಕ, “ತಾನು ಸಿದ್ದರಾಮಯ್ಯ ಆಪ್ತ, ನಾವಿಬ್ಬರೂ ಚಡ್ಡಿ ದೋಸ್ತ್ ಅಂತೆಲ್ಲಾ ಹೇಳಿಕೊಂಡು ಓಡಾಡಿದ್ದರು. ಅಲ್ಲದೆ ತಾವು ವಾಸವಾಗಿದ್ದ ಬಾಡಿಗೆ ಮನೆಗೂ ಸಿದ್ದ ರಾಮಯ್ಯ ಅವರನ್ನು ಕರೆಸಿ ಕ್ಷೇತ್ರದಲ್ಲಿ ಹವಾ ಮಾಡಿದ್ದರು. ಆದರೆ ಕೊನೆಗೇನಾಯ್ತು ಎನ್ನುವುದು ಜನ ಇನ್ನೂ ಮರೆತಿಲ್ಲ.

ಇನ್ನು ಯಲ್ಲಾಪುರ ಮೂಲದ ಬೆಂಗಳೂರಲ್ಲಿ ನೆಲೆಸಿದ್ದ ಉದ್ಯಮಿಗಳಾದ ಡಿ. ಅನಿಲ್‌ ಕುಮಾರ್ ಹಾಗೂ ಡಿ. ರವಿಕುಮಾರ್ ಅವರ ರಾಜಕೀಯ ಚಟುವಟಿಕೆಗಳೂ ಒಂದು ಹಂತದಲ್ಲಿ ಜಿಲ್ಲೆಯಲ್ಲೇ ಗಮನ ಸೆಳೆದಿದ್ದವು. ಆದರೆ ಕಾಲ ಕಳೆದಂತೆ ಅವರ ರಾಜಕೀಯ ಪ್ರಭಾವ ನಿರೀಕ್ಷಿತ ಮಟ್ಟದಲ್ಲಿ ಮುಂದುವರಿಯಲಿಲ್ಲ ಎನ್ನುವುದು ರಾಜಕೀಯ ಇತಿಹಾಸ.

ಇದೀಗ ಇದೇ ಪ್ರಶ್ನೆ ಕ್ಷೇತ್ರದ ಬಗ್ಗೆ ಸೂಕ್ಷ್ಮವಾಗಿ ಅರಿಯದೆ ತಾನು “ರೆಡಿ” ಎಂದುಕೊಂಡು ಬಂದು ದೇವರ ಪ್ರಸಾದಗಳ ಹರಾಜು, ಕಾರ್ಯಕ್ರಮಗಳಿಗೆ ಲಕ್ಷ ಲಕ್ಷ ದೇಣಿಗೆ ನೀಡಿದ ಮಾತ್ರಕ್ಕೆ ಈ ಕ್ಷೇತ್ರದ ಜನ ತಮ್ಮನ್ನೇ ಕ್ಷೇತ್ರದ ಶಾಸಕ ಮಾಡಿ ಬಿಡುತ್ತಾರೆ ಎಂದು ಬೆವರು ಸುರಿಸದಯೇ ತಂದ ಎಲ್ಲಾ ಹಣವನ್ನು ನೀರಿನಂತೆ ಚೆಲ್ಲಿದರೆ ಮೂರು ರಸ್ತೆಯಿಂದ ಹರಿದ ಬಂದ ನೀರು ಅಘನಾಶಿನಿ ನದಿಗೆ ಸೇರಿದಂತಾಗುವುದರಲ್ಲಿ ಎರಡು ಮಾತಿಲ್ಲ.

2023ರ ವಿಧಾನಸಭಾ ಚುನಾವಣೆಗೆ ಮುನ್ನ ಕುಮಟಾ ಕ್ಷೇತ್ರದಲ್ಲಿ ಕಾಂಗ್ರೆಸ್ ಟಿಕೆಟ್ ವಿಚಾರ ಭಾರೀ ಚರ್ಚೆಗೆ ಕಾರಣವಾಗಿತ್ತು. ಹಲವಾರು ಆಕಾಂಕ್ಷಿಗಳ ನಡುವೆ ನಿವೇದಿತ್ ಆಳ್ವಾ ಅವರಿಗೆ ಟಿಕೆಟ್ ಘೋಷಣೆಯಾಗಿತ್ತು, ಸ್ಥಳೀಯ ಕಾಂಗ್ರೆಸ್ ವಲಯದಲ್ಲಿ ಅಸಮಾಧಾನವೂ ವ್ಯಕ್ತವಾಗಿತ್ತು. ಮಾಜಿ ಶಾಸಕಿ ಶಾರದಾ ಶೆಟ್ಟಿ ಪಕ್ಷೇತರವಾಗಿ ಸ್ಪರ್ಧಿಸುವ ಹಂತಕ್ಕೂ ಬೆಳವಣಿಗೆ ನಡೆದಿತ್ತು. ನಂತರ ಚುನಾವಣಾ ರಾಜಕೀಯದ ಬಳಿಕ ನಿವೇದಿತ್ ಆಳ್ವಾ ಅವರ ಸುತ್ತಲೂ ಒಂದು ತಂಡ ರೂಪುಗೊಂಡಿತ್ತು. ಆದರೆ ಆ ತಂಡ ಎಷ್ಟು ಕಾಲ ಪರಿಣಾಮಕಾರಿಯಾಗಿ ಉಳಿಯಿತು ಎಂಬುದು ಇದೀಗ ರಾಜಕೀಯ ಚರ್ಚೆಯ ವಿಷಯವಾಗಿದೆ.

ಕಾರ್ಯಕರ್ತರ ಮನ ಗೆಲ್ಲುವುದೇ ಸವಾಲು…
ಕುಮಟಾ ಕಾಂಗ್ರೆಸ್ಸಿನಲ್ಲಿ ಬಹುಕಾಲದಿಂದ ಕಾರ್ಯಕರ್ತರ ಪಾತ್ರ ಪ್ರಮುಖವಾಗಿದೆ. ನಾಯಕರ ಕಾರ್ಯಕ್ರಮಗಳಿಗೆ ಜನ ಸೇರುವುದು ಮಾತ್ರವಲ್ಲದೆ, ಗ್ರಾಮ ಮಟ್ಟದಿಂದ ಪಕ್ಷ ಸಂಘಟನೆಯನ್ನು ಬಲಪಡಿಸುವುದು ಚುನಾವಣಾ ರಾಜಕಾರಣದಲ್ಲಿ ಸಾಕಷ್ಟು ಮಹತ್ವ ಪಡೆದುಕೊಳ್ಳುತ್ತದೆ. ಹೀಗಾಗಿ ಯಾವುದೇ ನಾಯಕರು ಕ್ಷೇತ್ರದಲ್ಲಿ ಎಷ್ಟೇ ದೊಡ್ಡ ಮಟ್ಟದಲ್ಲಿ ಕಾರ್ಯಕ್ರಮಗಳನ್ನು ನಡೆಸಿದರೂ ತಳಮಟ್ಟದ ಕಾರ್ಯಕರ್ತರೊಂದಿಗೆ ನಿರಂತರ ಸಂಪರ್ಕ, ಸ್ಥಳೀಯ ಸಮಸ್ಯೆಗಳಿಗೆ ಸ್ಪಂದನೆ ಹಾಗೂ ಪಕ್ಷ ಸಂಘಟನೆಯಲ್ಲಿ ಅವರ ಪಾತ್ರ ಮುಖ್ಯ ಎಂಬ ಅಭಿಪ್ರಾಯ ಇದೆ.

‘ಹವಾ’ ಸಾಕಾ…? ಸಂಘಟನೆ ಬೇಕಾ?
ಕುಮಟಾ ರಾಜಕೀಯದಲ್ಲಿ ಹಿಂದೆ ಹಲವು ಬಾರಿ ಆರಂಭದಲ್ಲಿ ದೊಡ್ಡ ಮಟ್ಟದ ರಾಜಕೀಯ ಚಟುವಟಿಕೆಗಳು ಕಂಡುಬಂದಿವೆ. ಆದರೆ ಆ ಚಟುವಟಿಕೆಗಳು ನಿರಂತರ ರಾಜಕೀಯ ಸಂಘಟನೆಯಾಗಿ ರೂಪಾಂತರಗೊಳ್ಳದಿದ್ದರೆ, ಆರಂಭದ ಹವಾ ನಿಧಾನವಾಗಿ ಕಡಿಮೆಯಾಗುವ ಸಾಧ್ಯತೆಯಿದೆ. ಹೀಗಾಗಿ ದಿ. ಯಶೋಧರ ನಾಯ್ಕ, ಡಿ. ಅನಿಲ್‌ ಕುಮಾರ್, ಡಿ. ರವಿಕುಮಾರ್ ಹಾಗೂ ನಿವೇದಿತ್ ಆಳ್ವಾ ಅವರ ರಾಜಕೀಯ ಸೂಕ್ಷ್ಮವಾಗಿ ಗಮನಿಸದೆ ಹೋದರೆ ತಾನೇ ಅಭ್ಯರ್ಥಿ ಎಂದು ʼರೆಡಿʼ ಆಗಿರುವವರಿಗೂ ಅದೇ ಗತಿ ಬರಬಹುದೇ? ಎಂಬ ಚರ್ಚೆ ಇದೀಗ ಕೇಳಿಬರುತ್ತಿದೆ.

ರಾಜಕೀಯದಲ್ಲಿ ಏನು ಬೇಕಾದರಾಗಬಹುದು…
ಚುನಾವಣೆ ಘೋಷಣೆಯಾದಾಗ ಅನೇಕರ ಪಲ್ಲಟವಾಗುವುದನ್ನು ಈಗಾಗಲೇ ಕ್ಷೇತ್ರ ನೋಡಿದೆ. ಕಾಗೆ ಗೂಡಲ್ಲಿ ಕೋಗಿಲೆ ಮೊಟ್ಟೆ ಇಡುವಂತೆ ಯಾರೋ ಕಟ್ಟಿ ಬೆಳೆಸಿದ ಪಕ್ಷದಲ್ಲಿ ಮತ್ಯಾರೋ ಬಂದು ನಾಯಕರಾಗುವುದು, ಹಾಗೆ ಬಂದ ನಾಯಕ ಪಕ್ಷಕ್ಕಾಗಿ ದುಡಿದವರನ್ನೇ ಕಡೆಗಣಿಸುವುದು ಇಲ್ಲಿನ ರಾಜಕೀಯದಲ್ಲಿ ಮೋಸ್ಟ್ ಕಾಮನ್. ಈಗಾಗಲೇ ಜನಪ್ರತಿನಿಧಿಯೊಬ್ಬರು ಮುಂದೆ ತಾನು ಮಂತ್ರಿಯಾಗಬೇಕೆಂಬ ಕನಸು ಕಾಣುತ್ತಿರುವುದು ಇಲ್ಲಿನ ರಾಜಕೀಯದಲ್ಲಿ ಗುಟ್ಟಾಗಿ ಉಳಿದಿಲ್ಲ. ಇಲ್ಲಿ ಮುಂದೆ ಯಾರು ಯಾವ ಪಕ್ಷದತ್ತ ವಾಲಲಿದ್ದಾರೆ ಎನ್ನುವುದು ಇನ್ನೂ ನಿಶ್ಚಯವಾಗದ ಕಾರಣ ಇಲ್ಲಿನ ರಾಜಕೀಯದಲ್ಲಿ ಏನು ಬೇಕಾದರಾಗಬಹುದು. ರಾಜಕೀಯ ಎಂದರೆ ಹರಾಜು ಕೂಗಿದಷ್ಟು ಸುಲಭವಲ್ಲ ಎನ್ನುವುದನ್ನು ರೆಡಿ ಅಭ್ಯರ್ಥಿ ಅರಿತರೆ ಅವರಿಗೇ ಒಳಿತು ಎನ್ನುವುದು ರಾಜಕೀಯ ವಿಶ್ಲೇಷಕರ ಕಿವಿಮಾತು.