ಸುದ್ದಿಬಿಂದು ಬ್ಯೂರೋ ವರದಿ
ಕುಮಟಾ: ಪಟ್ಟಣದ ಐತಿಹಾಸಿಕ ಹಾಗೂ ಸಾಂಸ್ಕೃತಿಕ ಹೆಗ್ಗುರುತಾಗಿರುವ ಮಣಕಿ ಮೈದಾನವನ್ನು ಉಳಿಸಿ, ಅದನ್ನು ಸಂಪೂರ್ಣವಾಗಿ ಸಾರ್ವಜನಿಕರ ಬಳಕೆಗೆ ಮೀಸಲಿಡಬೇಕೆಂಬ ಆಗ್ರಹದೊಂದಿಗೆ ಕುಮಟಾ ಅಭಿವೃದ್ಧಿಪರ ಚಿಂತಕರ ವೇದಿಕೆ ಹೋರಾಟಕ್ಕೆ ಕರೆ ನೀಡಿದೆ.
ಮಣಕಿ ಮೈದಾನ ಕೇವಲ ಬಯಲು ಜಾಗವಲ್ಲ. ಅದು ಕುಮಟಾದ ಜನಜೀವನ, ಕ್ರೀಡೆ, ಕಲೆ, ಸಂಸ್ಕೃತಿ ಹಾಗೂ ಸಾರ್ವಜನಿಕ ಸಂಭ್ರಮಗಳೊಂದಿಗೆ ಬೆಸೆದುಕೊಂಡಿರುವ ಹೆಮ್ಮೆಯ ತಾಣವಾಗಿದೆ. ನಾಡಿನ ವಿವಿಧ ಭಾಗಗಳ ಕಲಾವಿದರು, ಕ್ರೀಡಾಪಟುಗಳು ಹಾಗೂ ಸಾವಿರಾರು ಜನರ ಸಂಭ್ರಮಕ್ಕೆ ಸಾಕ್ಷಿಯಾಗಿರುವ ಈ ಮೈದಾನವು ರಾಜ್ಯಮಟ್ಟದಲ್ಲಿಯೂ ಗಮನ ಸೆಳೆದಿದೆ ಎಂದು ವೇದಿಕೆ ತಿಳಿಸಿದೆ. ಆದರೆ ಇಂದು ವಿವಿಧ ವಿವಾದಗಳ ಸುಳಿಯಲ್ಲಿ ಸಿಲುಕಿರುವ ಮಣಕಿ ಮೈದಾನದಲ್ಲಿ ಸಾಂಸ್ಕೃತಿಕ ಹಾಗೂ ಕ್ರೀಡಾ ಚಟುವಟಿಕೆಗಳು ಸ್ಥಗಿತಗೊಂಡಿರುವುದು ಬೇಸರದ ಸಂಗತಿಯಾಗಿದೆ. ಮೈದಾನದ ಮೌನದಿಂದಾಗಿ ಕುಮಟಾ ನಗರದ ಸಾರ್ವಜನಿಕ ಹಾಗೂ ಸಾಂಸ್ಕೃತಿಕ ಚಟುವಟಿಕೆಗಳಿಗೂ ಹಿನ್ನಡೆಯಾಗಿದೆ ಎಂದು ವೇದಿಕೆ ಆತಂಕ ವ್ಯಕ್ತಪಡಿಸಿದೆ.
ಮಕ್ಕಳ ಆಟೋಟ, ಯುವಕರ ಪ್ರತಿಭಾ ಪ್ರದರ್ಶನ, ಕ್ರೀಡಾಕೂಟಗಳು, ಸಾಂಸ್ಕೃತಿಕ ಕಾರ್ಯಕ್ರಮಗಳು ಹಾಗೂ ಊರಿನ ಹಬ್ಬ-ಹರಿದಿನಗಳ ಸಂಭ್ರಮ ಮತ್ತೆ ಮಣಕಿ ಮೈದಾನದಲ್ಲಿ ಮರುಕಳಿಸಬೇಕು. ಯಾವುದೇ ಸ್ವಾರ್ಥ ಹಿತಾಸಕ್ತಿಗಳಿಗೆ ಮೈದಾನ ಬಲಿಯಾಗದೆ, ಅದು ಸಂಪೂರ್ಣವಾಗಿ ಸಾರ್ವಜನಿಕರ ಸ್ವತ್ತಾಗಿ ಉಳಿಯಬೇಕು ಎಂಬುದು ವೇದಿಕೆಯ ಪ್ರಮುಖ ಒತ್ತಾಯವಾಗಿದೆ.ಇದು ಕೇವಲ ಮೈದಾನದ ಉಳಿವಿನ ಪ್ರಶ್ನೆಯಲ್ಲ, ಕುಮಟಾದ ಸ್ವಾಭಿಮಾನದ ಪ್ರಶ್ನೆಯಾಗಿದೆ. ನಗರದ ಪ್ರತಿಯೊಬ್ಬ ನಾಗರಿಕರೂ ಪಕ್ಷ, ಜಾತಿ ಹಾಗೂ ವೈಯಕ್ತಿಕ ಭಿನ್ನಾಭಿಪ್ರಾಯಗಳನ್ನು ಬದಿಗಿಟ್ಟು ಒಗ್ಗಟ್ಟಿನಿಂದ ಧ್ವನಿ ಎತ್ತಿದಾಗ ಮಾತ್ರ ಮಣಕಿ ಮೈದಾನದ ಗತವೈಭವವನ್ನು ಮರಳಿ ತರಲು ಸಾಧ್ಯ ಎಂದು ವೇದಿಕೆ ಅಭಿಪ್ರಾಯಪಟ್ಟಿದೆ.
ಈ ನಿಟ್ಟಿನಲ್ಲಿ ‘ನಮ್ಮ ನೆಲ, ನಮ್ಮ ಹೆಮ್ಮೆ, ನಮ್ಮ ಹಕ್ಕು’ ಎಂಬ ಆಶಯದೊಂದಿಗೆ ಮಣಕಿ ಮೈದಾನ ಉಳಿವಿನ ಹೋರಾಟಕ್ಕೆ ಕೈಜೋಡಿಸುವಂತೆ ಕುಮಟಾದ ಸಮಸ್ತ ನಾಗರಿಕರಲ್ಲಿ ಕುಮಟಾ ಅಭಿವೃದ್ಧಿಪರ ಚಿಂತಕರ ವೇದಿಕೆ ಮನವಿ ಮಾಡಿದೆ.
ಇದನ್ನೂ ಓದಿ/ಹುತಾತ್ಮ ಯೋಧ ಗಿರೀಶ ನಾಯ್ಕ ಮನೆಗೆ ಅನಂತಮೂರ್ತಿ ಹೆಗಡೆ ಭೇಟಿ; ಕುಟುಂಬಕ್ಕೆ ಆರ್ಥಿಕ ನೆರವು, ಸಾಂತ್ವನ
