ಸುದ್ದಿಬಿಂದು ಬ್ಯೂರೋ ವರದಿ
ಕಾರವಾರ : ಗೋವಾದಿಂದ ಅಕ್ರಮವಾಗಿ ಮದ್ಯ ಸಾಗಿಸುತ್ತಿದ್ದ ವಾಹನ ಕರ್ನಾಟಕದ ಗಡಿ ದಾಟಿದ ನಿಖರ ಅವಧಿಯ ಕುರಿತು ಸುದ್ದಿಬಿಂದು ನ್ಯೂಸ್‌ಗೆ ಮಹತ್ವದ ಮಾಹಿತಿ ಲಭ್ಯವಾಗಿದೆ. ಮಧ್ಯರಾತ್ರಿ 2.22ಕ್ಕೆ ಈ ಅಕ್ರಮ ಮದ್ಯ ಸಾಗಾಟದ ವಾಹನ ಗೋವಾ ಗಡಿ ದಾಟಿ ಕರ್ನಾಟಕ ಪ್ರವೇಶಿಸಿದೆ. ಈ ಮಹತ್ವದ ಮಾಹಿತಿ ಇದೀಗ ಅಬಕಾರಿ ಇಲಾಖೆಯ ಗಡಿ ತಪಾಸಣಾ ವ್ಯವಸ್ಥೆಯನ್ನೇ ಪ್ರಶ್ನಿಸುವಂತೆ ಮಾಡಿದೆ.
ಸಾಮಾನ್ಯವಾಗಿ ಗಡಿ ಭಾಗದಲ್ಲಿ ಅಕ್ರಮ ಮದ್ಯ ಸಾಗಾಟ ತಡೆಯಲು ಅಬಕಾರಿ ಇಲಾಖೆಯ ಸಿಬ್ಬಂದಿಗಳು ರಾತ್ರಿ ಹಗಲು ನಿಗಾ ವಹಿಸಬೇಕಿದೆ. ಆದರೆ ಮಧ್ಯರಾತ್ರಿ 2-22ರ ಅವಧಿಯಲ್ಲಿ ವಾಹನ ಗಡಿ ದಾಟುವಾಗ ಇಲಾಖೆಯ ಸಿಬ್ಬಂದಿಗಳು ಎಲ್ಲಿ ಇದ್ದರು? ವಾಹನ ತಪಾಸಣೆ ನಡೆಯುತ್ತಿತ್ತೇ? ಗಡಿ ಭಾಗದಲ್ಲಿ ರಾತ್ರಿ ಗಸ್ತು ವ್ಯವಸ್ಥೆ ಕಾರ್ಯನಿರ್ವಹಿಸುತ್ತಿತ್ತೇ? ಎಂಬ ಪ್ರಶ್ನೆಗಳು ಇದೀಗ ಚರ್ಚೆಗೆ ಗ್ರಾಸವಾಗಿವೆ.
ಸಿಸಿಟಿವಿಯಲ್ಲಿದೆ ಪ್ರಕರಣದ ಪ್ರಮುಖ ಸುಳಿವು!
ಅಕ್ರಮ ಮದ್ಯ ಸಾಗಾಟದ ವಾಹನ ಗಡಿ ದಾಟಿದ ಸಮಯದ ಬಗ್ಗೆ ಮಾಹಿತಿ ಲಭ್ಯವಾಗಿರುವ ಹಿನ್ನೆಲೆಯಲ್ಲಿ, ಸಂಬಂಧಪಟ್ಟ ಗಡಿ ಭಾಗದ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸುವುದು ಮಹತ್ವದ್ದಾಗಿದೆ. ಮಧ್ಯರಾತ್ರಿ 2.22 ನಡುವಿನ ದೃಶ್ಯಾವಳಿಗಳನ್ನು ಪರಿಶೀಲಿಸಿದರೆ ವಾಹನದ ಸಂಚಾರ, ಗಡಿ ದಾಟಿದ ಸಮಯ ಹಾಗೂ ಅದರ ಮಾರ್ಗದ ಕುರಿತು ಸ್ಪಷ್ಟ ದಾಖಲೆ ದೊರೆಯಬಹುದು. ಅದೇ ರೀತಿ, ಆ ಸಮಯದಲ್ಲಿ ಕರ್ತವ್ಯದಲ್ಲಿದ್ದ ಅಬಕಾರಿ ಸಿಬ್ಬಂದಿಗಳ ಹಾಜರಾತಿ ಮತ್ತು ತಪಾಸಣಾ ದಾಖಲೆಗಳನ್ನೂ ಪರಿಶೀಲಿಸಬೇಕಿದೆ.
ಗಡಿಯಲ್ಲಿ ಅಬಕಾರಿ ಇಲಾಖೆ ಕಣ್ಮುಚ್ಚಿ ಕುಳಿತಿತ್ತೇ?
ಗೋವಾದಿಂದ ಅಕ್ರಮ ಮದ್ಯ ಕರ್ನಾಟಕಕ್ಕೆ ಪ್ರವೇಶಿಸದಂತೆ ತಡೆಯಬೇಕಾದ ಜವಾಬ್ದಾರಿ ಅಬಕಾರಿ ಇಲಾಖೆಯ ಮೇಲಿದೆ. ಹೀಗಿರುವಾಗ ಅಕ್ರಮ ಮದ್ಯದ ವಾಹನ ಗಡಿ ದಾಟಿ ಉಡುಪಿವರೆಗೆ ತಲುಪಿರುವುದು ಇಲಾಖೆಯ ಕಾರ್ಯವೈಖರಿಯ ಬಗ್ಗೆ ಗಂಭೀರ ಪ್ರಶ್ನೆಗಳು ಹುಟ್ಟುಹಾಕಿದೆ. ಇದು ಕೇವಲ ಅಕ್ರಮ ಮದ್ಯ ಸಾಗಾಟದ ಪ್ರಕರಣವಲ್ಲ; ಗಡಿ ಭಾಗದ ತಪಾಸಣೆ, ರಾತ್ರಿ ಗಸ್ತು ಹಾಗೂ ಸಿಬ್ಬಂದಿಗಳ ಕರ್ತವ್ಯ ನಿರ್ವಹಣೆಯ ಬಗ್ಗೆಯೂ ಉತ್ತರ ಕೇಳುವ ಬೆಳವಣಿಗೆಯಾಗಿದೆ. ಈ ಬಗ್ಗೆ ಅಬಕಾರಿ ಇಲಾಖೆಯ ಹಿರಿಯ ಅಧಿಕಾರಿಗಳು ತಕ್ಷಣ ಗಮನಹರಿಸಿ ತನಿಖೆ ನಡೆಸಬೇಕಿದೆ
