ಎರಡು ವರ್ಷ ಪೂರೈಸಿದ ನಿಮ್ಮ "ಸುದ್ದಿ ಬಿಂದು" : ಲಕ್ಷಾಂತರ ಓದುಗರ ವಿಶ್ವಾಸದೊಂದಿಗೆ ಮನೆ ಮಾತಾದ ವೆಬ್ ನ್ಯೂಸ್

ಉತ್ತರಕನ್ನಡ ಜಿಲ್ಲೆಯ ಓದುಗರ ಮನೆ ಮಾತಾಗಿರುವ “ಸುದ್ದಿ ಬಿಂದು” ವೆಬ್ ನ್ಯೂಸ್ ಇಂದು ತನ್ನ ಎರಡು ವರ್ಷದ ಯಶಸ್ವಿ ಪಯಣವನ್ನು ಪೂರೈಸಿದೆ. ಕೇವಲ ಒಂದು ಆಲೋಚನೆಯಾಗಿ ಹುಟ್ಟಿದ ಈ ಡಿಜಿಟಲ್ ಮಾಧ್ಯಮ ವೇದಿಕೆ ಇಂದು ಲಕ್ಷಾಂತರ ಓದುಗರ ವಿಶ್ವಾಸವನ್ನು ಗಳಿಸಿ, ಜಿಲ್ಲೆಯ ನಂಬರ್ ಒನ್ ವೆಬ್ ನ್ಯೂಸ್ ಸೈಟ್ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.

ಸುದ್ದಿ ಬಿಂದು ಎಂದರೆ ಕೇವಲ ಸುದ್ದಿ ನೀಡುವ ತಾಣವಲ್ಲ — ಅದು ಜನರ ಧ್ವನಿ. ಗ್ರಾಮೀಣ ಪ್ರದೇಶದಿಂದ ಹಿಡಿದು ನಗರ ಬದುಕಿನವರೆಗೆ, ಸಮಸ್ಯೆ, ಸಾಧನೆ, ಪ್ರತಿಭೆ ಮತ್ತು ಸತ್ಯವನ್ನು ನೇರವಾಗಿ ಓದುಗರ ಮುಂದೆ ತರುವ ಪ್ರಾಮಾಣಿಕ ಪ್ರಯತ್ನವೇ ಸುದ್ದಿ ಬಿಂದು ವಿಶೇಷತೆ.

ಇಂದಿನ ಡಿಜಿಟಲ್ ಯುಗದಲ್ಲಿ ಸುದ್ದಿ ವೇಗವಾಗಿ ಹರಡುವಾಗ, ಅದರ ನಿಖರತೆ ಮತ್ತು ನೈತಿಕತೆ ಅತ್ಯಂತ ಮಹತ್ವದ್ದು. ಈ ಮೌಲ್ಯಗಳನ್ನು ಅಪ್ಪಿಕೊಂಡೇ ಸುದ್ದಿ ಬಿಂದು ಎರಡು ವರ್ಷಗಳಿಂದ ನಿರಂತರವಾಗಿ ಸೇವೆ ಸಲ್ಲಿಸುತ್ತಿದೆ. ರಾಜಕೀಯ, ಅಪರಾಧ, ತನಿಖಾ ವರದಿ, ಶಿಕ್ಷಣ, ಸಂಸ್ಕೃತಿ, ಕ್ರೀಡೆ —ಎಲ್ಲ ಕ್ಷೇತ್ರಗಳ ಸುದ್ದಿಗೂ ಸಮಾನ ಮಹತ್ವ ನೀಡುವ ಮೂಲಕ ಉತ್ತರಕನ್ನಡ ಜಿಲ್ಲೆಯ ಸಮಗ್ರ ಚಿತ್ರಣವನ್ನು ಕಟ್ಟಿಕೊಟ್ಟಿದೆ.

ವಿಶೇಷವಾಗಿ ಸ್ಥಳೀಯ ಸಮಸ್ಯೆಗಳತ್ತ ಸುದ್ದಿ ಬಿಂದು ಮಾಡಿದ ಹಲವು ವರದಿ ಅಧಿಕಾರಿಗಳ ಗಮನ ಸೆಳೆದಿದೆ. ಜನಸಾಮಾನ್ಯರ ಸಂಕಷ್ಟಗಳಿಗೆ ವೇದಿಕೆ ಕಲ್ಪಿಸುವ ಮೂಲಕ ಮಾಧ್ಯಮದ ಸಾಮಾಜಿಕ ಜವಾಬ್ದಾರಿಯನ್ನು ಯಶಸ್ವಿಯಾಗಿ ನಿರ್ವಹಿಸಿದೆ. ಈ ಎರಡು ವರ್ಷಗಳ ಪಯಣ ಸಾಧ್ಯವಾಗಿದ್ದು ನಿಮ್ಮೆಲ್ಲರ ಪ್ರೀತಿ, ವಿಶ್ವಾಸ ಮತ್ತು ಬೆಂಬಲದಿಂದಲೇ. ಪ್ರತಿದಿನ ನಮ್ಮ ಸುದ್ದಿಯನ್ನು ಓದಿ, ಹಂಚಿಕೊಂಡು, ಅಭಿಪ್ರಾಯ ವ್ಯಕ್ತಪಡಿಸುವ ಪ್ರತಿಯೊಬ್ಬ ಓದುಗರು ನಮ್ಮ ಶಕ್ತಿಯಾಗಿದ್ದಾರೆ. ಅವರೇ ನಮ್ಮ ಪ್ರೇರಣೆ, ಅವರೇ ನಮ್ಮ ಗುರಿ.