ಸುದ್ದಿಬಿಂದು ಬ್ಯೂರೋ ವರದಿ
ಕಾರವಾರ/ಗೋವಾ: ಹೊರ ರಾಜ್ಯದ ರಜಿಸ್ಟ್ರೇಶನ್ ಹೊಂದಿರುವ ವಾಹನಗಳನ್ನು ಗೋವಾದಲ್ಲಿ ಹೆಚ್ಚು ದಿನ ಬಳಸುವಂತಿಲ್ಲ. ಈ ಹಿನ್ನೆಲೆಯಲ್ಲಿ ಗೋವಾದಲ್ಲಿ ಓಡಾಟ ನಡೆಸುವ ಹೊರ ರಾಜ್ಯಗಳ ವಾಹನಗಳಿಗೆ ಗೋವಾ ರಜಿಸ್ಟ್ರೇಶನ್ ಕಡ್ಡಾಯಗೊಳಿಸಬೇಕು ಎಂದು ಗೋವಾ ವಿಧಾನಸಭೆಯಲ್ಲಿ ಚರ್ಚೆಯಾಗಿದೆ. ಇದರಿಂದಾಗಿ ಗೋವಾದಲ್ಲಿ ಕರ್ನಾಟಕ ರಜಿಸ್ಟ್ರೇಶನ್ ಹೊಂದಿರುವ ಕರ್ನಾಟಕದ ವಾಹನ ಮಾಲೀಕರಿಗೆ ತೊಂದರೆಯುಂಟಾಗುವಂತಾಗಿದೆ.
ಈ ಕುರಿತಂತೆ ಶಾಸಕಿ ದಿಲೈಲಾ ಲೋಬೊ ಅವರು ಗೋವಾ ವಿಧಾನಸಭೆಯಲ್ಲಿ ಅಗ್ರಹಿಸಿದ್ದಾರೆ. ಗೋವಾದಲ್ಲಿ ಬಹು ಮುಖ್ಯವಾಗಿ ಹೊರ ರಾಜ್ಯದ ರಜಿಸ್ಟ್ರೇಶನ್ ಹೊಂದಿರುವ ವಾಹನಗಳನ್ನು ಡಿಲಿವರಿ ಬಾಯ್ ಕೆಲಸ ಮಾಡುವವರು ಹೆಚ್ಚಾಗಿ ಬಳಕೆ ಮಾಡುತ್ತಾರೆ. ಇಷ್ಟೇ ಅಲ್ಲದೆ ಗೋವಾದಲ್ಲಿ ವಾಸಿಸುವ ಹೊರ ರಾಜ್ಯದ ಹೆಚ್ಚಿನ ಜನರು ಹೊರ ರಾಜ್ಯದ ರಜಿಸ್ಟ್ರೇಶನ್ ವಾಹನಗಳನ್ನೇ ಬಳಸುತ್ತಾರೆ. ಇವುಗಳನ್ನು ಪತ್ತೆಹಚ್ಚಲು ಗೋವಾದಲ್ಲಿ ಬಾಡಿಗೆಗೆ ವಾಸಿಸುವ ಹೊರ ರಾಜ್ಯದ ಜನರ ತಪಾಸಣೆ ನಡೆಸಿದಂತೆಯೇ ವಾಹನಗಳ ತಪಾಸಣೆಯನ್ನೂ ನಡೆಸಬೇಕು. ಗೋವಾದಲ್ಲಿ ಬಳಕೆಯಾಗುವ ವಾಹನಗಳ ರಜಿಸ್ಟ್ರೇಶನ್ ಗೋವಾ ರಾಜ್ಯದ್ದೇ ಆಗಿರುವುದು ಕಡ್ಡಾಯವಾಗಬೇಕು ಎಂದು ಅವರು ಅಭಿಪ್ರಾಯ ಮಂಡಿಸಿದರು.
ಗೋವಾದಲ್ಲಿ ಲಕ್ಷಾಂತರ ಸಂಖ್ಯೆಯಲ್ಲಿ ಕನ್ನಡಿಗರು ವಾಸಿಸುತ್ತಿದ್ದಾರೆ. ಇಷ್ಟೇ ಅಲ್ಲದೆ ವಲಸೆ ಕನ್ನಡಿಗರ ಸಂಖ್ಯೆಯೂ ಹೆಚ್ಚಿದೆ. ಆದರೆ ಗೋವಾದಲ್ಲಿ ವಾಹನ ಬಳಸಬೇಕಾದರೆ ಈ ವಾಹನ ಸವಾರರು ಕರ್ನಾಟಕ ನೊಂದಣಿಯನ್ನು ಬದಲಾಯಿಸಿ ಗೋವಾದ ರಜಿಸ್ಟ್ರೇಶನ್ ಮಾಡಿಸಿಕೊಳ್ಳಬೇಕಾದರೆ ಅನಿವಾರ್ಯವಾಗಿ ಹೆಚ್ಚಿನ ಹಣ ಖರ್ಚು ಮಾಡಬೇಕಾಗುತ್ತದೆ. ಇದರಿಂದಾಗಿ ಗೋವಾದಲ್ಲಿ ನೆಲೆಸಿರುವ ಹೆಚ್ಚಿನ ಕನ್ನಡಿಗರಿಗೆ ತೊಂದರೆಯಾಗಲಿದೆ.
ಗೋವಾದಲ್ಲಿ ಡಿಲಿವರಿ ಬಾಯ್ ಆಗಿ ಕೆಲಸ ಮಾಡುವಂತಹ ಅದೆಷ್ಟೋ ಕನ್ನಡಿಗರಿದ್ದಾರೆ. ಅವರು ಕರ್ನಾಟಕದಲ್ಲಿ ಸಾಲಸೂಲ ಮಾಡಿ ಬೈಕ್ ಖರೀದಿಸಿ ಗೋವಾಕ್ಕೆ ಬಂದು ಇಲ್ಲಿ ಉದರನಿರ್ವಹಣೆಗೆ ಡಿಲಿವರಿ ಬಾಯ್ ಆಗಿ ಕೆಲಸ ಮಾಡುತ್ತಿದ್ದಾರೆ. ಆದರೆ ಇಂತಹ ಬಡ ಕುಟುಂಬದವರು ಮತ್ತೆ ಗೋವಾದಲ್ಲಿ ಅದೇ ಬೈಕ್‌ಗೆ ಗೋವಾ ರಜಿಸ್ಟ್ರೇಶನ್ ಮಾಡಿಸಬೇಕಾದರೆ ಹೆಚ್ಚಿನ ತೊಂದರೆ ಎದುರಾಗಲಿದೆ. ಗೋವಾ ಸರ್ಕಾರವು ಹೊರ ರಾಜ್ಯದ ವಾಹನಗಳಿಗೆ ಗೋವಾ ರಜಿಸ್ಟ್ರೇಶನ್ ಕಡ್ಡಾಯಗೊಳಿಸುವ ಸಾಧ್ಯತೆಯಿದೆ ಎನ್ನಲಾಗಿದೆ.
ಇದನ್ನೂ ಓದಿ:ಆರೋಗ್ಯ ಸಚಿವರ ಕುಮಟಾ ಸರಕಾರಿ ಆಸ್ಪತ್ರೆ ಭೇಟಿ ರದ್ದಾಗುವ ಸಾಧ್ಯತೆ
