ಸುದ್ದಿಬಿಂದು ಬ್ಯೂರೋ ವರದಿ
ಕಾರವಾರ: ಗೋವಾದಿಂದ ಕರ್ನಾಟಕಕ್ಕೆ ಅಕ್ರಮವಾಗಿ ಸಾಗಿಸಲಾಗುತ್ತಿದ್ದ ಬರೋಬ್ಬರಿ 2,583 ಲೀಟರ್ ಮದ್ಯವನ್ನು ಉಡುಪಿ ಜಿಲ್ಲೆಯ ಹೆಜಮಾಡಿ ಟೋಲ್ ಗೇಟ್ ಸಮೀಪ ಪಡುಬಿದ್ರಿ ಪೊಲೀಸರು ವಶಪಡಿಸಿಕೊಂಡಿರುವ ಪ್ರಕರಣ ಇದೀಗ ರಾಜ್ಯದ ಅಬಕಾರಿ ಇಲಾಖೆಯ ಗಡಿ ತಪಾಸಣಾ ವ್ಯವಸ್ಥೆಯನ್ನೇ ಪ್ರಶ್ನಿಸುವಂತೆ ಮಾಡಿದೆ. ಸುಮಾರು 300 ಬಾಕ್ಸ್ ಮದ್ಯವನ್ನು ತುಂಬಿಕೊಂಡು ಹೊರಟಿದ್ದ ವಾಹನ ಕರ್ನಾಟಕದ ಗಡಿ ದಾಟಿ, ಎರಡು ಚೆಕ್‌ಪೋಸ್ಟ್‌ಗಳನ್ನು ಹಾದು, ಉಡುಪಿಯವರೆಗೆ ತಲುಪುವವರೆಗೂ ಅಬಕಾರಿ ಇಲಾಖೆಯ ಕಣ್ಣುಗಳಿಗೆ ಕಾಣಿಸಲಿಲ್ಲವೇ? ಅಥವಾ ಕಂಡರೂ ಕಾಣದಂತೆ ಇದ್ದರೇ? ಎನ್ನುವ ಬಗ್ಗೆ ಇದೀಗ ಸಾರ್ವಜನಿಕರು ಪ್ರಶ್ನೆ ಮಾಡುವಂತಾಗಿದೆ.
ಗೋವಾದಿಂದ ಮಂಗಳೂರಿನತ್ತ ಸಾಗುತ್ತಿದ್ದ ಮಹೀಂದ್ರಾ ಪಿಕಪ್ ವಾಹನದಲ್ಲಿ ಭಾರಿ ಪ್ರಮಾಣದ ಮದ್ಯ ಸಾಗಿಸಲಾಗುತ್ತಿತ್ತು. ಈ ವಾಹನಕ್ಕೆ ಬೆಂಗಾವಲಾಗಿ ಬರುತ್ತಿದ್ದ ಮಾರುತಿ ಸ್ವಿಫ್ಟ್ ಕಾರನ್ನೂ ಪೊಲೀಸರು ವಶಕ್ಕೆ ಪಡೆದಿದ್ದಾರೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಕಾರವಾರ ಮೂಲದ ನಾಲ್ವರನ್ನು ವಶಕ್ಕೆ ಪಡೆಯಲಾಗಿದೆ. ಜಪ್ತಿಯಾದ ಮದ್ಯದ ಮೌಲ್ಯ ಸುಮಾರು 14.35 ಲಕ್ಷ ರೂ.ಗಳಾಗಿದ್ದು, ವಾಹನಗಳು ಸೇರಿದಂತೆ ಒಟ್ಟು ಜಪ್ತಿ ಸೊತ್ತುಗಳ ಮೌಲ್ಯ 22.35 ಲಕ್ಷ ರೂ. ಎಂದು ಅಂದಾಜಿಸಲಾಗಿದೆ.
ಎರಡು ಚೆಕ್‌ಪೋಸ್ಟ್‌ ದಾಟಿದರೂ ಸಿಗದ ಅಕ್ರಮ ಮದ್ಯ!
ಮದ್ಯ ಸಾಗಿಸುತ್ತಿದ್ದ ವಾಹನ ಕಾರವಾರ ಭಾಗದಿಂದಲೇ ಹೊರಟು ಎರಡು ಚೆಕ್‌ಪೋಸ್ಟ್‌ಗಳನ್ನು ದಾಟಿಕೊಂಡು ಉಡುಪಿಯ ಹೆಜಮಾಡಿ ಟೋಲ್ ಗೇಟ್‌ವರೆಗೆ ತಲುಪಿದೆ. ಹಾಗಾದರೆ ಗೋವಾ ಗಡಿಯಿಂದಲೇ ಕಟ್ಟುನಿಟ್ಟಿನ ತಪಾಸಣೆ ನಡೆಸಬೇಕಾದ ಅಬಕಾರಿ ಇಲಾಖೆ ಅಧಿಕಾರಿಗಳು ಏನು ಮಾಡುತ್ತಿದ್ದರು.ಸಾವಿರಾರು ಲೀಟರ್ ಮದ್ಯ ಸಾಗಿಸುತ್ತಿದ್ದ ವಾಹನ ಅಧಿಕಾರಿಗಳ ಗಮನಕ್ಕೆ ಬರಲಿಲ್ಲವೇ? ವಾಹನವನ್ನು ತಡೆದು ಪರಿಶೀಲಿಸುವ ಕನಿಷ್ಠ ಕರ್ತವ್ಯವನ್ನೂ ನಿರ್ವಹಿಸಲಿಲ್ಲವೇ ? ಗಡಿಭಾಗದಲ್ಲಿ ಚೆಕ್‌ಪೋಸ್ಟ್‌ಗಳನ್ನು ನಿರ್ಮಿಸಿರುವುದು ಕೇವಲ ನಾಮಫಲಕ ಹಾಕುವುದಕ್ಕಲ್ಲ. ಅಕ್ರಮ ಮದ್ಯ ಸಾಗಾಟ, ತೆರಿಗೆ ವಂಚನೆ ಹಾಗೂ ಕಾನೂನುಬಾಹಿರ ಚಟುವಟಿಕೆಗಳಿಗೆ ಕಡಿವಾಣ ಹಾಕುವುದಕ್ಕಾಗಿಯೇ ಸರ್ಕಾರ ಲಕ್ಷಾಂತರ ರೂಪಾಯಿ ವೆಚ್ಚದಲ್ಲಿ ಸಿಬ್ಬಂದಿ, ಮೂಲಸೌಕರ್ಯ ಹಾಗೂ ಸಿಸಿ ಕ್ಯಾಮರಾಗಳ ವ್ಯವಸ್ಥೆ ಮಾಡಿದೆ. ಆದರೂ ಇಷ್ಟೊಂದು ದೊಡ್ಡ ಪ್ರಮಾಣದ ಮದ್ಯ ಎರಡು ಚೆಕ್‌ ಪೊಸ್ಟ್‌ ದಾಟಿ ಹೋಗಿದ್ದರೆ, ಆ ವ್ಯವಸ್ಥೆಯ ಪ್ರಯೋಜನವೇನು ಎಂಬ ಪ್ರಶ್ನೆ ಸಹಜವಾಗಿಯೇ ಉದ್ಭವಿಸುತ್ತದೆ.
ಸಾಮಾನ್ಯರಿಗೆ ಮಾತ್ರ ಕಾನೂನಿನ ಬಿಸಿ ; ಲಕ್ಷಾಂತರ ಮೌಲ್ಯದ ಮದ್ಯಕ್ಕೆ ದಾರಿ
ಗೋವಾ ಗಡಿಭಾಗದಲ್ಲಿ ಸಾಮಾನ್ಯ ಜನರು, ಪ್ರವಾಸಿಗರು ಹಾಗೂ ಇತರ ರಾಜ್ಯಗಳಿಂದ ಬರುವ ವಾಹನಗಳನ್ನು ತಡೆದು ದಾಖಲೆ ಪರಿಶೀಲನೆ ನಡೆಸಲಾಗುತ್ತದೆ. ಕೆಲವೊಮ್ಮೆ ಒಂದೆರಡು ಬಾಟಲಿ ಮದ್ಯ ತಂದರೂ ಅನುಮಾನದ ದೃಷ್ಟಿಯಿಂದ ವಿಚಾರಣೆ ನಡೆಸಿ, ಪ್ರಕರಣ ದಾಖಲಿಸುವ ಸಂದರ್ಭಗಳಿವೆ. ಆದರೆ ಅದೇ ಗಡಿಯ ಮೂಲಕ ಸುಮಾರು 300ಬಾಕ್ಸ್ ಮದ್ಯ ಸಾಗಿಸುತ್ತಿದ್ದ ವಾಹನಗಳು ಯಾವುದೇ ತಡೆಯಿಲ್ಲದೆ ಮುಂದೆ ಸಾಗಿದ್ದರೆ, ಸಾಮಾನ್ಯರಿಗೆ ಒಂದು ಕಾನೂನು, ಅಕ್ರಮ ಸಾಗಾಟಗಾರರಿಗೆ ಮತ್ತೊಂದು ಕಾನೂನೇ ಎಂಬ ಪ್ರಶ್ನೆ ಮೂಡೂವಂತಾಗಿದೆ.
ಸಾಮಾನ್ಯ ವಾಹನ ಸವಾರರನ್ನು ನಿಲ್ಲಿಸಿ ತಪಾಸಣೆ ನಡೆಸುವ ಅಧಿಕಾರಿಗಳಿಗೆ ಲಕ್ಷಾಂತರ ಮೌಲ್ಯದ ಮದ್ಯ ಸಾಗಿಸುತ್ತಿದ್ದ ವಾಹನಗಳು ಯಾಕೆ ಕಣ್ಣಿಗೆ ಕಾಣಿಸಲಿಲ್ಲ? ಚೆಕ್‌ಪೋಸ್ಟ್‌ಗಳಲ್ಲಿ ಅಳವಡಿಸಿರುವ ಸಿಸಿ ಕ್ಯಾಮರಾಗಳಲ್ಲಿ ಈ ಸಿಬ್ಬಂದಿಗಳು ಆ ವಾಹನ ಸಾಗುವಾಗ ಸೌಜನ್ಯಕ್ಕಾದ್ದರೂ ತಪಾಸಣೆ ನಡೆಸಿದ್ದಾರೆಯೇ ಎನ್ನುವುದನ್ನ ಕೂಡ ಈಗ ಪರಿಶೀಲನೆ ನಡೆಸಬೇಕಿದೆ. ಒಮ್ಮೆ ಪರಿಶೀಲಿಸಿದ್ದು ಹೌದಾಗಿದ್ದರೆ ಅಕ್ರಮ ಮದ್ಯ ಪತ್ತೆಯಾಗದಿರಲು ಕಾರಣವೇನು ? ಈ ಪ್ರಶ್ನೆಗಳಿಗೆ ಇಲಾಖೆ ಉತ್ತರ ನೀಡಲೇಬೇಕಿದೆ.
ಅಕ್ರಮ ಮದ್ಯ ಸಾಗಾಟ ವಾಹನಕ್ಕೆ ಹಸಿರು ನಿಶಾನೆ ಕೊಟ್ಟವರು ಯಾರು?
ಗಡಿ ತಪಾಸಣಾ ಕೇಂದ್ರಗಳಲ್ಲಿ ಸಿಸಿ ಕ್ಯಾಮರಾಗಳನ್ನು ಅಳವಡಿಸಿರುವ ಉದ್ದೇಶವೇ ಪ್ರತಿಯೊಂದು ವಾಹನದ ಸಂಚಾರದ ಮೇಲೆ ನಿಗಾ ಇಡುವುದು. ಹಾಗಿದ್ದಾಗ ಈ ವಾಹನ ಯಾವ ಸಮಯದಲ್ಲಿ ಗಡಿ ದಾಟಿದೆ. ಅಂದು ಕರ್ತವ್ಯದಲ್ಲಿದ್ದ ಅಧಿಕಾರಿಗಳು ಮತ್ತು ಸಿಬ್ಬಂದಿ ಯಾರು ? ವಾಹನವನ್ನು ತಡೆದು ತಪಾಸಣೆ ನಡೆಸಲಾಗಿದೆಯೇ. ನಡೆಸಿದ್ದರೆ ಅದರ ದಾಖಲೆ ಎಲ್ಲಿದೆ? ಎಂಬುದನ್ನು ಸಿಸಿ ಕ್ಯಾಮರಾ ದೃಶ್ಯಾವಳಿ ಹಾಗೂ ಕರ್ತವ್ಯ ನಿರ್ವಹಣಾ ದಾಖಲೆಗಳ ಮೂಲಕ ಪರಿಶೀಲಿಸಿ ಮುಂದಿನ ಕ್ರಮ ಕೈಗೊಳ್ಳಬೇಕಿದೆ,ಅದು ಅಲ್ಲದೆ ಇದೇ ರೀತಿ ಇದುವರಗೆ ಅದೆಷ್ಟು ಮದ್ಯದ ವಾಹನಗಳಿಗೆ ಹಸಿರು ನಿಶಾನೆ ನೀಡಲಾಗಿದೆ ಎನ್ನುವ ಬಗ್ಗೆ ಕೂಡ ತನಿಖೆ ನಡೆಸಬೇಕಾಗಿದೆ ಎನ್ನುವುದು ಸಾರ್ವಜನಿಕರ ಮಾತಾಗಿದೆ.
ಚೆಕ್‌ಪೋಸ್ಟ್‌ಗಳು ಕೇವಲ ಜನರ ಕಣ್ಣಿಗೆ ಕಾಣುವ ಪ್ರದರ್ಶನದ ಕೇಂದ್ರಗಳಾಗಬಾರದು; ಅಕ್ರಮ ಸಾಗಾಟಗಾರರಿಗೆ ಭಯ ಹುಟ್ಟಿಸುವ ತಪಾಸಣಾ ಕೇಂದ್ರಗಳಾಗಬೇಕು. ಸಾರ್ವಜನಿಕರ ತೆರಿಗೆ ಹಣದಲ್ಲಿ ನಡೆಯುವ ಇಲಾಖೆ ತನ್ನ ಮೂಲ ಕರ್ತವ್ಯವನ್ನೇ ಸಮರ್ಪಕವಾಗಿ ನಿರ್ವಹಿಸದಿದ್ದರೆ ಅದಕ್ಕೆ ಯಾರು ಹೊಣೆ.?
ಪಡುಬಿದ್ರಿ ಪೊಲೀಸರು ಕಾರ್ಯಾಚರಣೆ ನಡೆಸಿ ಅಕ್ರಮ ಮದ್ಯವನ್ನು ಪತ್ತೆಹಚ್ಚಿರುವುದು ಶ್ಲಾಘನೀಯ. ಆದರೆ ಉಡುಪಿಯಲ್ಲಿ ಪೊಲೀಸರಿಗೆ ಕಾಣಿಸಿದ 300 ಬಾಕ್ಸ್ ಮದ್ಯ,ಗೋವಾ ಗಡಿಯಿಂದ ಕರ್ನಾಟಕ ಪ್ರವೇಶಿಸುವಾಗ ಅಬಕಾರಿ ಇಲಾಖೆಯ ಕಣ್ಣಿಗೆ ಏಕೆ ಬಿದ್ದಿಲ್ಲ ಎನ್ನುವುದೇ ಪ್ರಮುಖ ಚರ್ಚೆಗೆ ಕಾರಣವಾಗಿದೆ.
