ಸುದ್ದಿಬಿಂದು ಬ್ಯೂರೋ ವರದಿ
ಅಂಕೋಲಾ : ದೀಪಾವಳಿ ಎಂದರೆ ಕೇವಲ ದೀಪಗಳ ಹಬ್ಬವಲ್ಲ, ಪ್ರೀತಿ, ವಿಶ್ವಾಸ, ಆತ್ಮೀಯತೆ ಹಾಗೂ ಸಂತೋಷವನ್ನು ಹಂಚಿಕೊಳ್ಳುವ ಹಬ್ಬ. ಈ ಹಬ್ಬದ ನಿಜವಾದ ಅರ್ಥವನ್ನು ತಮ್ಮ ಕಾರ್ಯದ ಮೂಲಕ ಸಾಕಾರಗೊಳಿಸುತ್ತಿದ್ದಾರೆ ಗಣಪತಿ ಮೂಲೆಮನೆ.
ಪ್ರತಿವರ್ಷದಂತೆ ಈ ವರ್ಷವೂ ದೀಪಾವಳಿ ಹಬ್ಬದ ಪ್ರಯುಕ್ತ ಗಣಪತಿ ಮೂಲೆಮನೆ ಅವರು ಬೆಲೆಕೇರಿ ಕ್ರಾಸ್‌ನಲ್ಲಿರುವ ತಮ್ಮ ಸ್ವಂತ ಸೈಟ್‌ನಲ್ಲಿ ತಮ್ಮಲ್ಲಿರುವ ಎಲ್ಲಾ ವಾಹನಗಳಿಗೆ ಪೂಜೆಯನ್ನು ನೆರವೇರಿಸಿದರು. ಈ ಸಂದರ್ಭದಲ್ಲಿ ನೂರಾರು ಜನರನ್ನು ಆಹ್ವಾನಿಸಿ, ಎಲ್ಲರಿಗೂ ಮಹಿಳೆಯರು ಪುರುಷರು ಸೇರಿದಂತೆ ಎಲ್ಲರಿಗೂ ಬಟ್ಟೆಗಳನ್ನು ಉಡುಗೊರೆಯಾಗಿ ನೀಡುವ ಮೂಲಕ ಹಬ್ಬದ ಸಂಭ್ರಮಕ್ಕೆ ಮತ್ತಷ್ಟು ಮೆರುಗು ನೀಡಿದರು.
ತಮ್ಮ ದುಡಿಮೆಯ ಬದುಕಿನಲ್ಲಿ ಸಿಕ್ಕ ಸಂತೋಷವನ್ನು ತಮ್ಮಲ್ಲೇ ಇಟ್ಟುಕೊಳ್ಳದೆ, ನೂರಾರು ಜನರೊಂದಿಗೆ ಹಂಚಿಕೊಳ್ಳುವ ಅವರ ವಿಶಾಲ ಹೃದಯ ನಿಜಕ್ಕೂ ಮೆಚ್ಚುವಂತಹದ್ದು.ಪ್ರತಿವರ್ಷವೂ ಈ ಸಂಪ್ರದಾಯವನ್ನು ರೂಢಿಸಿಕೊಂಡು ಬಂದಿರುವ ಮೂಲೆಮನೆಯವರು ಈ ವರ್ಷ ಕೂಡ ಮುಂದುವರೆಸಿದ್ದಾರೆ. ಒಂದು ಉಡುಗೊರೆ ನೀಡುವುದು ದೊಡ್ಡ ವಿಚಾರವಲ್ಲ; ಆದರೆ ನೂರಾರು ಜನರನ್ನು ನೆನಪಿಸಿಕೊಂಡು, ಅವರ ಸಂತೋಷದಲ್ಲೇ ತಮ್ಮ ಸಂತೋಷವನ್ನು ಕಾಣುವ ಮನಸ್ಸು ಎಲ್ಲರಿಗೂ ಸಿಗುವುದಿಲ್ಲ. ಗಣಪತಿ ಮೂಲೆಮನೆ ಅವರು ತಮ್ಮ ಈ ನಡೆ ಮೂಲಕ ಹಣಕ್ಕಿಂತ ಹೃದಯ ಶ್ರೀಮಂತಿಕೆ ದೊಡ್ಡದು ಎಂಬುದನ್ನು ಸಾಬೀತುಪಡಿಸಿದ್ದಾರೆ.
ವಾಹನ ಪೂಜೆಯ ಧಾರ್ಮಿಕ ಸಂಭ್ರಮದ ಜೊತೆಗೆ ನೂರಾರು ಕುಟುಂಬಗಳಿಗೆ ಹಬ್ಬದ ಖುಷಿ ಹಂಚಿದ ಗಣಪತಿ ಮೂಲೆಮನೆ ಅವರ ಕಾರ್ಯ ಎಲ್ಲರಿಗೂ ಪ್ರೇರಣೆಯಾಗುವಂತಿದೆ. ಅವರ ಈ ಆತ್ಮೀಯತೆ, ಉದಾರತೆ ಹಾಗೂ ಜನರೊಂದಿಗಿನ ಬಾಂಧವ್ಯ ಹೀಗೆಯೇ ಮುಂದುವರಿಯಲಿ ಎಂಬುದು ಪ್ರತಿಯೊಬ್ಬರ ಆಶಯವಾಗಿದೆ. ತಮ್ಮ ಸಂತೋಷದಲ್ಲಿ ನೂರಾರು ಜನರ ಮುಖಗಳಲ್ಲಿ ನಗು ಮೂಡಿಸುವುದೇ ನಿಜವಾದ ಹಬ್ಬದ ಸಾರ್ಥಕತೆ ಎಂಬುದಕ್ಕೆ ಗಣಪತಿ ಮೂಲೆಮನೆ ಅವರ ಈ ವಿಶೇಷ ಆಚರಣೆ ಉದಾಹರಣೆಯಾಗಿದೆ.
