ಬೆಂಗಳೂರು: ಐಪಿಎಲ್ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡದ ಪರ ಆಲ್ರೌಂಡ್ ಪ್ರದರ್ಶನ ನೀಡಿ ಕನ್ನಡಿಗರ ನೆಚ್ಚಿನ ‘ಇಂಗ್ಲಿಷ್ ಹುಡುಗ’ನಾಗಿ ಹೊರಹೊಮ್ಮಿರುವ ಜೇಕಬ್ ಬೆಥೆಲ್ (Jacob Bethell) ಈಗ ಹೊಸ ಕಾರಣಕ್ಕೆ ಸುದ್ದಿಯಲ್ಲಿದ್ದಾರೆ.
ಮೈದಾನದಲ್ಲಿ ಸಿಕ್ಸರ್-ಬೌಂಡರಿಗಳ ಮೂಲಕ ಅಬ್ಬರಿಸಿದ್ದ ಈ 22 ವರ್ಷದ ಇಂಗ್ಲೆಂಡ್ ಆಟಗಾರ, ಈಗ ಭಾರತೀಯ ಚಿತ್ರರಂಗದ ಉದಯೋನ್ಮುಖ ನಟಿ ಹಾಗೂ ಕನ್ನಡತಿ ಆಧ್ಯಾ ಆನಂದ್ (Aadhya Anand) ಪ್ರೀತಿಯ ಬಲೆಯಲ್ಲಿ ಬಿದ್ದಿದ್ದಾರಾ? ಇಂತಹುದೊಂದು ರೋಚಕ ಗಾಸಿಪ್ ಈಗ ಕ್ರಿಕೆಟ್ ಮತ್ತು ಸಿನಿಮಾ ವಲಯದಲ್ಲಿ ಸಿಕ್ಕಾಪಟ್ಟೆ ಸದ್ದು ಮಾಡುತ್ತಿದೆ.
ನೆಟ್ಫ್ಲಿಕ್ಸ್ನ ‘ಬಾಂಬೆ ಬೇಗಮ್ಸ್’ ಹಾಗೂ ‘ಕ್ರಶ್ಡ್’ ವೆಬ್ ಸೀರೀಸ್ ಮೂಲಕ ದೇಶಾದ್ಯಂತ ‘ನ್ಯಾಷನಲ್ ಕ್ರಷ್’ ಆಗಿರುವ ಆಧ್ಯಾ ಆನಂದ್ ಜೊತೆ ಜೇಕಬ್ ಸೀಕ್ರೆಟ್ ಡೇಟಿಂಗ್ ಮಾಡುತ್ತಿದ್ದಾರೆ ಎಂಬ ವದಂತಿಗಳು ಸೋಶಿಯಲ್ ಮೀಡಿಯಾದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿವೆ.
ಇನ್ಸ್ಟಾಗ್ರಾಮ್ ಲೈಕ್ಸ್ ಮತ್ತು ರೆಡ್ಡಿಟ್ ಪೋಸ್ಟ್ ಕಿಡಿ!
ಇತ್ತೀಚೆಗೆ ಮುಕ್ತಾಯಗೊಂಡ ಐಪಿಎಲ್ ಮತ್ತು ಟಿ20 ವಿಶ್ವಕಪ್ನಲ್ಲಿ ಅಬ್ಬರಿಸಿದ್ದ ಜೇಕಬ್ ಬೆಥೆಲ್, ನಟಿ ಆಧ್ಯಾ ಆನಂದ್ ಅವರ ಪ್ರತಿಯೊಂದು ಇನ್ಸ್ಟಾಗ್ರಾಮ್ ಪೋಸ್ಟ್ಗಳಿಗೂ ಲೈಕ್ ಒತ್ತುತ್ತಿರುವುದನ್ನು ಆರ್ಸಿಬಿಯ ಕಟ್ಟಾ ಅಭಿಮಾನಿಗಳು ಪತ್ತೆಹಚ್ಚಿದ್ದಾರೆ. ಇದರ ಬೆನ್ನಲ್ಲೇ, ಜೇಕಬ್ ಮತ್ತು ಆಧ್ಯಾ ಒಟ್ಟಿಗೆ ಕಾಫಿ ಹಂಚಿಕೊಳ್ಳುತ್ತಿರುವ ಫೋಟೋವೊಂದು ರೆಡ್ಡಿಟ್ (Reddit) ಮತ್ತು ಎಕ್ಸ್ (ಟ್ವಿಟರ್) ವೇದಿಕೆಗಳಲ್ಲಿ ಹರಿದಾಡಲು ಶುರುವಾಗಿದೆ. ಇವರಿಬ್ಬರ ನಡುವೆ ಪ್ರೀತಿ ಅಂಕುರಿಸಿದೆ ಎಂಬ ಗಾಸಿಪ್ಗೆ ಈ ಫೋಟೋ ಮತ್ತಷ್ಟು ರೆಕ್ಕೆಪುಕ್ಕ ನೀಡಿದೆ.
ಯಾರೀ ಆಧ್ಯಾ ಆನಂದ್? ಇವರ ಹಿನ್ನೆಲೆಯೇನು?
ಮೂಲತಃ ಕನ್ನಡತಿಯಾಗಿರುವ ಆಧ್ಯಾ ಆನಂದ್ ಅವರ ಪ್ರತಿಭೆ ಜಾಗತಿಕ ಮಟ್ಟದ್ದು. ಸಿಂಗಾಪುರದಲ್ಲಿ ರಂಗಭೂಮಿ ತರಬೇತಿ ಪಡೆದಿರುವ ಇವರು, ಬಾಲಿವುಡ್ನ ದಿಗ್ಗಜ ನಟ ಅನುಪಮ್ ಖೇರ್ ಮತ್ತು ಅತುಲ್ ಮೊಂಗಿಯಾ ಅವರ ಇನ್ಸ್ಟಿಟ್ಯೂಟ್ನಲ್ಲೂ ನಟನಾ ತರಬೇತಿ ಪಡೆದಿದ್ದಾರೆ. ನೆಟ್ಫ್ಲಿಕ್ಸ್ನ ‘ಬಾಂಬೆ ಬೇಗಮ್ಸ್’ ಸರಣಿಯ ಮೂಲಕ ಭಾರತೀಯ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಿ, 2022ರಲ್ಲಿ ತೆರೆಕಂಡ ಅಮೆಜಾನ್ ಮಿನಿಯ ‘ಕ್ರಶ್ಡ್’ ಸಿರೀಸ್ ಮೂಲಕ ದೇಶಾದ್ಯಂತ ಅಪಾರ ಅಭಿಮಾನಿ ಬಳಗ ಸಂಪಾದಿಸಿದ್ದಾರೆ. ಪ್ರತಿಷ್ಠಿತ ಕೇನ್ ಇಂಟರ್ನ್ಯಾಷನಲ್ ಫಿಲಂ ಫೆಸ್ಟಿವಲ್-2017ರಲ್ಲಿ ಪ್ರದರ್ಶನ ಕಂಡಿದ್ದ ‘ಎ ಯೆಲ್ಲೋ ಬರ್ಡ್’, ‘ಒನ್ ಅವರ್ ಟು… ಡೇಲೈಟ್’ ಮತ್ತು ‘ಸ್ಕೈಸಿಟಿ’ಯಂಥ ಕಿರುಚಿತ್ರಗಳಲ್ಲೂ ಆಧ್ಯಾ ನಟಿಸಿ ಸೈ ಎನಿಸಿಕೊಂಡಿದ್ದಾರೆ.
ಆರ್ಸಿಬಿ ಫ್ಯಾನ್ಸ್ ವಲಯದಲ್ಲಿ ಹಲ್ಚಲ್
ಈ ಡೇಟಿಂಗ್ ಸುದ್ದಿಗಳ ಬಗ್ಗೆ ಆರ್ಸಿಬಿ ಆಟಗಾರ ಜೇಕಬ್ ಬೆಥೆಲ್ ಆಗಲಿ ಅಥವಾ ನಟಿ ಆಧ್ಯಾ ಆನಂದ್ ಆಗಲಿ ಎಲ್ಲೂ ಅಧಿಕೃತವಾಗಿ ಪ್ರತಿಕ್ರಿಯಿಸಿಲ್ಲ. ಹೀಗಾಗಿ ಈ ಪ್ರೇಮಕಥೆಯ ಸುತ್ತಲಿನ ಸಸ್ಪೆನ್ಸ್ ಹಾಗೇ ಮುಂದುವರಿದಿದೆ. ಇದು ಕೇವಲ ಸೋಶಿಯಲ್ ಮೀಡಿಯಾದ ಗಾಳಿ ಸುದ್ದಿಯೇ ಅಥವಾ ನಿಜವೇ ಎಂಬುದು ಇವರೇ ಸ್ಪಷ್ಟಪಡಿಸುವವರೆಗೂ ಕಾಯಬೇಕಿದೆ. ಕರ್ನಾಟಕದ ಹೆಮ್ಮೆಯ ತಂಡ ‘ಆರ್ಸಿಬಿ’ಯ ಆಟಗಾರನ ಜೊತೆ ಕನ್ನಡತಿಯೊಬ್ಬರ ಹೆಸರು ತಳುಕು ಹಾಕಿಕೊಂಡಿರುವುದು ಮಾತ್ರ ನಮ್ಮ ನಾಡಿನ ಕ್ರಿಕೆಟ್ ಅಭಿಮಾನಿಗಳಲ್ಲಿ ಸಖತ್ ಕುತೂಹಲ ಹಾಗೂ ಸಂಚಲನ ಮೂಡಿಸಿರುವುದಂತೂ ಸುಳ್ಳಲ್ಲ!
ʼಕನ್ನಡದಲ್ಲಿ ನಟಿಸುವಾಸೆʼ ಎಂದಿದ್ದರು!
ಈ ಹಿಂದೆ ‘ಕ್ರಶ್ಡ್’ ಸಿರೀಸ್ನ ಪ್ರಚಾರದ ವೇಳೆ ನೀಡಿದ ಸಂದರ್ಶನವೊಂದರಲ್ಲಿ, ʼನನ್ನ ಮಾತೃಭಾಷೆ ಕನ್ನಡ. ಚಂದನವನದಲ್ಲಿ (ಕನ್ನಡ ಚಿತ್ರರಂಗ) ನಟಿಸುವ ದೊಡ್ಡ ಆಸೆ ನನಗಿದೆʼ ಎಂದು ಆಧ್ಯಾ ತಮ್ಮ ಕನ್ನಡದ ಪ್ರೇಮವನ್ನು ಬಿಚ್ಚಿಟ್ಟಿದ್ದರು. ಬಾಲಿವುಡ್ ಹಾಗೂ ಉತ್ತರ ಭಾರತದ ಡಿಜಿಟಲ್ ಜಗತ್ತಿನಲ್ಲಿ ಈಗಾಗಲೇ ಧೂಳೆಬ್ಬಿಸುತ್ತಿರುವ ಈ ಕನ್ನಡದ ಕುವರಿ, ಮುಂಬರುವ ದಿನಗಳಲ್ಲಿ ದಕ್ಷಿಣ ಭಾರತದ ಚಿತ್ರರಂಗದಲ್ಲೂ ಮಿಂಚುತ್ತಾರಾ? ಜೊತೆಗೆ ಈ ಗಾಸಿಪ್ಗಳ ಬಗ್ಗೆ ಶೀಘ್ರದಲ್ಲೇ ತೆರೆ ಎಳೆಯುತ್ತಾರಾ ಎನ್ನುವುದನ್ನು ಕಾದು ನೋಡಬೇಕಿದೆ.
