ಸುದ್ದಿಬಿಂದು ಬ್ಯೂರೋ ವರದಿ
ಅಂಕೋಲಾ: ಉತ್ತರ ಕನ್ನಡ ಜಿಲ್ಲೆಯ ಅಂಕೋಲಾ ಪಟ್ಟಣದಲ್ಲಿ ಪ್ರತಿದಿನ ರಾತ್ರಿ ಸಾರ್ವಜನಿಕರ ಪ್ರದೇಶದಲ್ಲೇ ಯಾರ ಭಯವಿಲ್ಲದೇ ಜುಗಾರಿ ಆಟ ನಡೆಯುತ್ತಿರುವುದು ದೃಶ್ಯ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಪಟ್ಟಣದ ಪ್ರಮುಖ ರಸ್ತೆ ಹಾಗೂ ಜನಸಂಚಾರ ಹೆಚ್ಚಿರುವ ಪ್ರದೇಶಗಳಲ್ಲಿಯೇ ಜುಗಾರಿ ಅಡ್ಡೆಗಳು ರಾಜಾರೋಷವಾಗಿ ಕಾರ್ಯನಿರ್ವಹಿಸುತ್ತಿದೆ..ಜುಗರಿ ಆಟ ನಡೆಸುವವರಿಗೆ ಯಾರ ಭಯವೂ ಇರುವಂತೆ ಕಾಣುತ್ತಿಲ್ಲ. ನಡು ರಸ್ತೆಯಲ್ಲಿಯೇ ಜುಗಾರಿ ದರ್ಬಾರ್ ನಡೆಯುತ್ತಿದ್ದು, ಪಟ್ಟಣ ಹಾಗೂ ಗ್ರಾಮೀಣ ಪ್ರದೇಶದಲ್ಲಿ ಧಾರ್ಮಿಕ, ಸಾಂಸ್ಕೃತಿಕ ಅಥವಾ ಸಾರ್ವಜನಿಕ ಕಾರ್ಯಕ್ರಮಗಳು ನಡೆದರೂ ಅದರ ಪಕ್ಕದಲ್ಲೇ ಹತ್ತಕ್ಕೂ ಹೆಚ್ಚು ಜುಗಾರಿ ಮಂಡಗಳು ಹಾಜರಾಗಿರುತ್ತದೆ. ಫಿಕ್ಸ್. ಎಲೆ ಹಾಗೂ ನಂಬರ್ ಆಧಾರಿತ ಜುಗಾರಿ ಆಟಗಳಲ್ಲಿ ಹಣ ಹೂಡುತ್ತಿರುವ ಯುವಕರು ಸಾವಿರಾರು ರೂಪಾಯಿ ಕಳೆದುಕೊಳ್ಳುತ್ತಿದ್ದಾರೆ. ಜುಗಾರಿ ಜೊತೆ ಪಟ್ಟಣದಲ್ಲಿ ಓಸಿಮಟ್ಕಾ ಸೇರಿದಂತೆ ಅಕ್ರಮ ಚಟುವಟಿಕೆಗಳು ಜೋರಾಗಿದೆ ಎನ್ನುವ ಆರೋಪ ಸಹ ಇದೆ..
ಅಂಕೋಲಾ ಪೊಲೀಸ್ ಠಾಣಾ ವ್ಯಾಪ್ತಿಯ 150 ರಿಂದ 200 ಮೀಟರ್ ಅಂತರದಲ್ಲೇ ಈ ಜುಗಾರಿ ಅಡ್ಡೆಗಳು ಭರ್ಜರಿಯಾಗಿ ನಡೆಯುತ್ತಿದ್ದರೂ ಸ್ಥಳೀಯ ಪೊಲೀಸರು ಕೂಡ ಆ ಬಗ್ಗೆ ತಲೆ ಕೆಡಿಸಿಕೊಂಡಿರುವಂತೆ ಕಾಣುತ್ತಿಲ್ಲ. ಪೊಲೀಸರು ಸೈಲೆಂಟ್ ಆಗಿರುವುದು ಹತ್ತು ಹಲವು ಅನುಮಾನಗಳಿಗೆ ಕಾರಣವಾಗಿದೆ. ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಯಾಗಿ ದೀಪನ್ ಅವರು ಜಿಲ್ಲೆಗೆ ಬಂದ ಬಳಿಕ ಎಲ್ಲಾ ಕಡೆಯಲ್ಲಿಯೂ ಜುಗಾರಿ ಆಟಕ್ಕೆ ಕಡಿವಾಣ ಹಾಕಲಾಗಿತ್ತು. ಆದರೆ ಅಂಕೋಲಾ ವ್ಯಾಪ್ತಿಯ ಪೊಲೀಸರು ಜೂಗಾರಿ ದಂಧೆಕೋರರ ಜೊತೆ ಕೈಜೋಡಿಸಿ ಮೇಲಾಧಿಕಾರಿಗಳ ಗಮನಕ್ಕೆ ತರದೆ ಪರೋಕ್ಷವಾಗಿ ಸಾಮೀಲಾಗಿದ್ದಾರೆ ಎನ್ನುವ ಆರೋಪ ಅಂಕೋಲಾ ಪೊಲೀಸರ ವಿರುದ್ಧ ಕೇಳಿ ಬರುತ್ತಿದೆ.
“ಯಾರೇನು ಮಾಡಲಿ, ನಮಗೆ ಏನೂ ಆಗುವುದಿಲ್ಲ” ಎಂಬ ಧೋರಣೆಯೊಂದಿಗೆ ಜುಗಾರಿ ದಂಧೆಕೋರರು ಮುಕ್ತವಾಗಿ ಕಾರ್ಯನಿರ್ವಹಿಸುತ್ತಿರುವುದು ಕಾನೂನು ವ್ಯವಸ್ಥೆಗೆ ಸವಾಲಾಗಿರುವಂತಾಗಿದೆ. ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ದೀಪನ್ ಅವರೆ ಜುಗಾರಿ ಅಡ್ಡೆಗಳ ಮೇಲೆ ದಾಳಿ ನಡೆಸಿ,ಕ್ರಮ ಜರುಗಿಸಬೇಕಿದೆ..ಜುಗಾರಿ ಆಟದ ಎಲ್ಲಾ ವಿಡಿಯೋ ಸುದ್ದಿಬಿಂದುಗೆ ಸಹ ಲಭ್ಯವಾಗಿದೆ..
ಇದನ್ನೂ ಓದಿ/Union Budget / ಕೇಂದ್ರ ಬಜೆಟ್ 2026 ಮಂಡನೆ: ತೆರಿಗೆ, ಕೈಗಾರಿಕೆ, ಆರೋಗ್ಯ ಕ್ಷೇತ್ರಗಳಿಗೆ ಬಂಪರ್
