ಸುದ್ದಿಬಿಂದು ಬ್ಯೂರೋ ವರದಿ
ಮೀನು ಖರೀದಿಸುವ ಗ್ರಾಹಕರಿಗೆ ಸಿಹಿಸುದ್ದಿ. ಇನ್ಮುಂದೆ ಮಾರುಕಟ್ಟೆಗೆ ತೆರಳಿ ಯಾವ ಮೀನು ಸಿಗುತ್ತದೆ ಎಂದು ಹುಡುಕಾಡುವ ಅಗತ್ಯವಿಲ್ಲ. ಮನೆಯಲ್ಲೇ ಕುಳಿತು ಮೊಬೈಲ್ ಮೂಲಕ ಮಾರುಕಟ್ಟೆಯಲ್ಲಿ ಈ ಕ್ಷಣ ಯಾವೆಲ್ಲ ಮೀನು ಲಭ್ಯವಿದೆ ಎಂಬುದನ್ನು ತಿಳಿದುಕೊಂಡು ಖರೀದಿಸಲು ಅನುಕೂಲವಾಗುವ ‘ಮೀನು ಪೇಟೆ’ (Meenu Pete) ಎಂಬ ನೂತನ ಡಿಜಿಟಲ್ ವೇದಿಕೆ ಶೀಘ್ರದಲ್ಲೇ ಬಿಡುಗಡೆಯಾಗಲಿದೆ. ಮೀನು ಮಾರಾಟಗಾರರು ಮತ್ತು ಮೀನು ಖರೀದಿಸುವ ಗ್ರಾಹಕರನ್ನು ಡಿಜಿಟಲ್ ಮೂಲಕ ಒಂದೇ ವೇದಿಕೆಯಲ್ಲಿ ಸಂಪರ್ಕಿಸುವ ಉದ್ದೇಶದಿಂದ ಈ ವಿನೂತನ ಆ್ಯಪ್ ರೂಪಿಸಲಾಗುತ್ತಿದೆ. ಉತ್ತರ ಕನ್ನಡ ಜಿಲ್ಲೆಯ ಮೀನು ಮಾರುಕಟ್ಟೆಗಳನ್ನು ಗಮನದಲ್ಲಿಟ್ಟುಕೊಂಡು ಸಿದ್ಧಪಡಿಸಲಾಗುತ್ತಿರುವ ಈ ವೇದಿಕೆ ಮೀನು ವ್ಯಾಪಾರಕ್ಕೆ ಹೊಸ ಆಯಾಮ ನೀಡುವ ನಿರೀಕ್ಷೆಯಿದೆ.
ಏನಿದು ಮೀನು ಪೇಟೆ ಆ್ಯಪ್?
ಸಾಮಾನ್ಯವಾಗಿ ಗ್ರಾಹಕರು ಮೀನು ಖರೀದಿಸಲು ಮಾರುಕಟ್ಟೆಗೆ ತೆರಳಿದಾಗ ತಮಗೆ ಬೇಕಾದ ಮೀನು ಸಿಗುತ್ತದೆಯೋ ಇಲ್ಲವೋ ಎಂಬುದು ಮೊದಲೇ ತಿಳಿದಿರುವುದಿಲ್ಲ. ಕೆಲವೊಮ್ಮೆ ಮಾರುಕಟ್ಟೆಗೆ ಹೋದರೂ ನಿರೀಕ್ಷಿತ ಮೀನು ಸಿಗದೆ ವಾಪಸ್ ಬರುವ ಪರಿಸ್ಥಿತಿಯೂ ಇರುತ್ತದೆ. ಈ ಸಮಸ್ಯೆಗೆ ಪರಿಹಾರ ಕಲ್ಪಿಸುವ ಉದ್ದೇಶದಿಂದ ಮೀನು ಪೇಟೆ ಡಿಜಿಟಲ್ ವೇದಿಕೆಯನ್ನು ಪರಿಚಯಿಸಲಾಗುತ್ತಿದೆ. ಈ ಆ್ಯಪ್‌ನಲ್ಲಿ ಮೀನು ಮಾರಾಟಗಾರರು ತಾವು ಮಾರಾಟಕ್ಕೆ ಇಟ್ಟಿರುವ ಮೀನಿನ ಫೋಟೋ, ವಿಡಿಯೋ,ಮಾಹಿತಿ, ಬೆಲೆ ಹಾಗೂ ಲಭ್ಯವಿರುವ ಪ್ರಮಾಣದ ವಿವರಗಳನ್ನು ಅಪ್‌ಲೋಡ್ ಮಾಡಬಹುದು. ಇದರಿಂದ ಗ್ರಾಹಕರು ಮನೆಯಲ್ಲೇ ಕುಳಿತು ಯಾವ ಮಾರುಕಟ್ಟೆಯಲ್ಲಿ ಯಾವ ಮೀನು ಲಭ್ಯವಿದೆ, ಅದರ ಬೆಲೆ ಎಷ್ಟು ಎಂಬ ಮಾಹಿತಿಯನ್ನು ಸುಲಭವಾಗಿ ತಿಳಿದುಕೊಳ್ಳಬಹುದಾಗಿದೆ.ಬೇಕಾದಷ್ಟು ಮೀನು ಬುಕ್ ಮಾಡುವ ಅವಕಾಶ ಈ ಮೂಲಕ ಕಲ್ಪಿಸಲಾಗಿದೆ.
ಗ್ರಾಹಕರು ತಮಗೆ ಬೇಕಾದ ಮೀನಿನ ಲಭ್ಯತೆ ಪರಿಶೀಲಿಸಿ, ಅಗತ್ಯವಿರುವ ಪ್ರಮಾಣವನ್ನು ಆಯ್ಕೆ ಮಾಡಿಕೊಂಡು ಬುಕ್ ಮಾಡಬಹುದು. ಗ್ರಾಹಕರು ಬುಕ್ಕಿಂಗ್ ಮಾಡಿದ ತಕ್ಷಣ ಮಾರಾಟಗಾರರಿಗೆ ಮಾಹಿತಿ ತಲುಪುವ ವ್ಯವಸ್ಥೆಯೂ ಇರಲಿದೆ. ಇದರಿಂದ ಗ್ರಾಹಕರು ಮತ್ತು ಮಾರಾಟಗಾರರ ನಡುವಿನ ವ್ಯವಹಾರ ಮತ್ತಷ್ಟು ಸುಲಭ ಹಾಗೂ ವ್ಯವಸ್ಥಿತವಾಗಲಿದೆ.
ಲಾಗಿನ್ ಆಗುವುದು ಹೇಗೆ?
ಮೀನು ಪೇಟೆ ಆ್ಯಪ್ ಬಳಸಲು ಗ್ರಾಹಕರು ತಮ್ಮ ಹೆಸರು ಮತ್ತು ಮೊಬೈಲ್ ಸಂಖ್ಯೆಯನ್ನು ನಮೂದಿಸಿ ಸುಲಭವಾಗಿ ಲಾಗಿನ್ ಆಗಬಹುದು. ಸರಳ ನೋಂದಣಿ ಪ್ರಕ್ರಿಯೆಯ ಮೂಲಕ ಆ್ಯಪ್‌ನ ಸೌಲಭ್ಯಗಳನ್ನು ಪಡೆದುಕೊಳ್ಳಬಹುದು.
ಮೀನು ವ್ಯಾಪಾರಿಗಳಿಗೆ ಹೊಸ ಅವಕಾಶ
ಈ ವೇದಿಕೆ ಕೇವಲ ಗ್ರಾಹಕರಿಗೆ ಮಾತ್ರವಲ್ಲದೆ ಮೀನು ಮಾರಾಟಗಾರರಿಗೂ ಅನುಕೂಲವಾಗಲಿದೆ. ತಮ್ಮ ಬಳಿ ಇರುವ ಮೀನಿನ ವಿವರಗಳನ್ನು ಮೊಬೈಲ್ ಮೂಲಕವೇ ಗ್ರಾಹಕರಿಗೆ ತಲುಪಿಸಬಹುದು. ಇದರಿಂದ ವ್ಯಾಪಾರಿಗಳಿಗೆ ಹೆಚ್ಚಿನ ಗ್ರಾಹಕರನ್ನು ತಲುಪಲು ಹಾಗೂ ಮಾರಾಟವನ್ನು ವ್ಯವಸ್ಥಿತಗೊಳಿಸಲು ಅವಕಾಶ ದೊರೆಯಲಿದೆ.
ಉತ್ತರ ಕನ್ನಡದ ಮೀನು ಮಾರುಕಟ್ಟೆಗೆ ಡಿಜಿಟಲ್ ಸ್ಪರ್ಶ
ಕರಾವಳಿ ಭಾಗದಲ್ಲಿ ಮೀನುಗಾರಿಕೆ ಹಾಗೂ ಮೀನು ವ್ಯಾಪಾರ ಸಾವಿರಾರು ಕುಟುಂಬಗಳ ಬದುಕಿನ ಭಾಗವಾಗಿದೆ. ಇಂತಹ ಸಂದರ್ಭದಲ್ಲಿ ಮೀನು ಮಾರಾಟ ಮತ್ತು ಖರೀದಿ ಪ್ರಕ್ರಿಯೆಗೆ ತಂತ್ರಜ್ಞಾನದ ಸ್ಪರ್ಶ ನೀಡುವ ಮೀನು ಪೇಟೆ ಯೋಜನೆ ಗಮನ ಸೆಳೆಯುತ್ತಿದೆ. ಈ ಆ್ಯಪ್ ಬಿಡುಗಡೆಯಾದ ಬಳಿಕ ಗ್ರಾಹಕರು ಮಾರುಕಟ್ಟೆಯಲ್ಲಿ ಲಭ್ಯವಿರುವ ಮೀನಿನ ಮಾಹಿತಿಯನ್ನು ಮುಂಚಿತವಾಗಿ ತಿಳಿದುಕೊಂಡು ತಮ್ಮ ಅನುಕೂಲಕ್ಕೆ ತಕ್ಕಂತೆ ಖರೀದಿಸಲು ಸಾಧ್ಯವಾಗಲಿದೆ.
ಶೀಘ್ರದಲ್ಲೇ ಸಾರ್ವಜನಿಕ ಬಳಕೆಗೆ ಲಭ್ಯವಾಗಲಿರುವ ಈ ಡಿಜಿಟಲ್ ಮೀನು ಮಾರುಕಟ್ಟೆ ವೇದಿಕೆ ಉತ್ತರ ಕನ್ನಡ ಜಿಲ್ಲೆಯ ಮೀನು ವ್ಯಾಪಾರದಲ್ಲಿ ಹೊಸ ಬದಲಾವಣೆಗೆ ನಾಂದಿ ಹಾಡುವ ನಿರೀಕ್ಷೆಯಿದೆ.
ಹೆಚ್ಚಿನ ಮಾಹಿತಿಗಾಗಿ:
ವೆಬ್‌ಸೈಟ್: westernsearoots.com
ಆದಿ: 8722811774, ಗಜಾನನ: 9731697211 ಇವರನ್ನ ಸಂಪರ್ಕಿಸಬಹುದಾಗಿದೆ..
