ಸುದ್ದಿಬಿಂದು ಬ್ಯೂರೋ ವರದಿ
ಕುಮಟಾ: ಜಿಯೋ ಮೊಬೈಲ್ ನೆಟ್ವರ್ಕ್ ಪದೇಪದೆ ಕೈಕೊಡುತ್ತಿರುವುದರಿಂದ ಗ್ರಾಹಕರು ತೀವ್ರ ತೊಂದರೆ ಅನುಭವಿಸುತ್ತಿದ್ದಾರೆ. 5G ಪ್ಯಾಕೇಜ್ಗೆ ರೀಚಾರ್ಜ್ ಮಾಡಿದ್ದರೂ ಕೆಲವೆಡೆ 5G ಬದಲಾಗಿ 4G ನೆಟ್ವರ್ಕ್ಗೆ ಸಂಪರ್ಕಗೊಳ್ಳುತ್ತಿದ್ದು, ಇಂಟರ್ನೆಟ್ ವೇಗ ಕುಂಠಿತವಾಗುತ್ತಿದೆ ಎಂಬ ಆರೋಪಗಳು ಕೇಳಿಬಂದಿವೆ.
ಮೊಬೈಲ್ನಲ್ಲಿ 5G ಸೇವೆ ಲಭ್ಯವಿದೆ ಎಂದು ತೋರಿಸಿದರೂ ಕೆಲ ಸಮಯದಲ್ಲೇ ನೆಟ್ವರ್ಕ್ 4Gಗೆ ಬದಲಾಗುತ್ತಿದೆ. ಇದರಿಂದ ಆನ್ಲೈನ್ ಪಾವತಿ, ವಿಡಿಯೋ ಕರೆ, ಸಾಮಾಜಿಕ ಜಾಲತಾಣ ಬಳಕೆ, ಯೂಟ್ಯೂಬ್ ವೀಕ್ಷಣೆ ಸೇರಿದಂತೆ ಹಲವು ಅಗತ್ಯ ಸೇವೆಗಳಿಗೆ ತೊಂದರೆಯಾಗುತ್ತಿದೆ ಎಂದು ಗ್ರಾಹಕರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಜಿಯೋ ನೆಟ್ವರ್ಕ್ ಸಮಸ್ಯೆ ಕುರಿತು ಹಲವು ಬಾರಿ ಗ್ರಾಹಕ ಸೇವಾ ಕೇಂದ್ರಕ್ಕೆ ದೂರು ನೀಡಿದರೂ ಸಮಸ್ಯೆಗೆ ಶಾಶ್ವತ ಪರಿಹಾರ ಸಿಗುತ್ತಿಲ್ಲ ಎಂಬುದು ಗ್ರಾಹಕರ ಆರೋಪವಾಗಿದೆ.
ದುಬಾರಿ 5G ಪ್ಯಾಕೇಜ್ಗೆ ಹಣ ಪಾವತಿಸಿದರೂ ನಿರೀಕ್ಷಿತ ಗುಣಮಟ್ಟದ ಸೇವೆ ಸಿಗದಿರುವುದು ಗ್ರಾಹಕರ ಆಕ್ರೋಶಕ್ಕೆ ಕಾರಣವಾಗಿದೆ.ಇದೀಗ ನೆಟ್ವರ್ಕ್ ಸಮಸ್ಯೆಯಿಂದ ಬೇಸತ್ತಿರುವ ನೂರಾರು ಗ್ರಾಹಕರು ಜಿಯೋ ಸಿಮ್ಗಳನ್ನು ಬದಲಿಸಿ, ಇತರ ಮೊಬೈಲ್ ನೆಟ್ವರ್ಕ್ಗಳತ್ತ ಮುಖ ಮಾಡಲು ಮುಂದಾಗಿದ್ದಾರೆ ಎನ್ನಲಾಗಿದೆ. 5G ಹೆಸರಿನಲ್ಲಿ ರೀಚಾರ್ಜ್ ಮಾಡಿಸಿಕೊಂಡು 4G ವೇಗಕ್ಕೂ ಪರದಾಡುವಂತಾಗಿದೆ. ಗ್ರಾಹಕರ ಸಮಸ್ಯೆಯನ್ನು ಜಿಯೋ ಸಂಸ್ಥೆ ಗಂಭೀರವಾಗಿ ಪರಿಗಣಿಸಿ, ನೆಟ್ವರ್ಕ್ ಗುಣಮಟ್ಟ ಸುಧಾರಿಸಬೇಕು ಎಂಬ ಒತ್ತಾಯ ಕೇಳಿಬಂದಿದೆ.
