ಸುದ್ದಿಬಿಂದು ಬ್ಯೂರೋ ವರದಿ
ಕಾರವಾರ: ಭಾರತೀಯ ನೌಕಾಪಡೆಯ ಸಾಮರ್ಥ್ಯವನ್ನು ಮತ್ತಷ್ಟು ಬಲಪಡಿಸುವ ನಿಟ್ಟಿನಲ್ಲಿ ಸ್ವದೇಶಿ ನಿರ್ಮಿತ ಅತ್ಯಾಧುನಿಕ ಆ್ಯಂಟಿ ಸಬ್ಮರಿನ್ ವಾರ್ಫೇರ್ ಶ್ಯಾಲೋ ವಾಟರ್ ಕ್ರಾಫ್ಟ್ (ASW-SWC) INS ಮಾಲ್ವಾಣ್ ಯುದ್ಧನೌಕೆಯನ್ನು ಬುಧವಾರ ಕಾರವಾರದ INS ಕದಂಬ ನೌಕಾನೆಲೆಯಲ್ಲಿ ಲೋಕಾರ್ಪಣೆ ಮಾಡಲಾಯಿತು.
ಹಿರಿಯ ನೌಕಾಪಡೆ ಅಧಿಕಾರಿಗಳ ಸಮ್ಮುಖದಲ್ಲಿ ನಡೆದ ಸಮಾರಂಭದಲ್ಲಿ ಯುದ್ಧನೌಕೆಯನ್ನು ಅಧಿಕೃತವಾಗಿ ನೌಕಾಪಡೆಗೆ ಸೇರ್ಪಡೆಗೊಳಿಸಲಾಯಿತು. ಶತ್ರು ರಾಷ್ಟ್ರಗಳ ಸಬ್ಮರಿನ್ಗಳನ್ನು ಆಳ ಸಮುದ್ರದಲ್ಲೇ ಪತ್ತೆಹಚ್ಚಿ, ಅವುಗಳ ವಿರುದ್ಧ ಪರಿಣಾಮಕಾರಿ ಕಾರ್ಯಾಚರಣೆ ನಡೆಸುವ ಉದ್ದೇಶದಿಂದ ಈ ಯುದ್ಧನೌಕೆಯನ್ನು ವಿನ್ಯಾಸಗೊಳಿಸಲಾಗಿದೆ.
ಕೊಚ್ಚಿನ್ ಶಿಪ್ಯಾರ್ಡ್ ಲಿಮಿಟೆಡ್ ನಿರ್ಮಿಸಿರುವ INS ಮಾಲ್ವಾಣ್ ಸುಮಾರು 80 ಮೀಟರ್ ಉದ್ದ ಹಾಗೂ 1,100 ಟನ್ ಸ್ಥಳಾಂತರ ಸಾಮರ್ಥ್ಯ ಹೊಂದಿದೆ. ಆಧುನಿಕ ಸೋನಾರ್, ರಾಡಾರ್, ಆ್ಯಂಟಿ ಸಬ್ಮರಿನ್ ರಾಕೆಟ್ಗಳು ಸೇರಿದಂತೆ ಅತ್ಯಾಧುನಿಕ ಯುದ್ಧ ತಂತ್ರಜ್ಞಾನಗಳನ್ನು ಈ ನೌಕೆಯಲ್ಲಿ ಅಳವಡಿಸಲಾಗಿದೆ. ಇದರಿಂದ ಭಾರತೀಯ ನೌಕಾಪಡೆಯ ಸಮುದ್ರ ಭದ್ರತಾ ಸಾಮರ್ಥ್ಯ ಮತ್ತಷ್ಟು ವೃದ್ಧಿಯಾಗಲಿದೆ.
ಶಿವಾಜಿ ಮಹಾರಾಜರ ಪರಂಪರೆಯೊಂದಿಗೆ ನಂಟು
ಈ ಯುದ್ಧನೌಕೆಗೆ ‘ಮಾಲ್ವಾಣ್’ ಎಂದು ಹೆಸರಿಡುವುದಕ್ಕೂ ಐತಿಹಾಸಿಕ ಹಿನ್ನೆಲೆ ಇದೆ. ಛತ್ರಪತಿ ಶಿವಾಜಿ ಮಹಾರಾಜರು ಸಮುದ್ರ ಭದ್ರತೆಯನ್ನು ಬಲಪಡಿಸುವ ಉದ್ದೇಶದಿಂದ ನಿರ್ಮಿಸಿದ್ದ ಐತಿಹಾಸಿಕ ಸಿಂಧುದುರ್ಗ ಕೋಟೆ ಮಹಾರಾಷ್ಟ್ರದ ಮಾಲ್ವಣ್ ಪಟ್ಟಣದಲ್ಲಿದೆ. ಇದೇ ಪರಂಪರೆಯನ್ನು ಗೌರವಿಸುವ ಉದ್ದೇಶದಿಂದ ನೌಕೆಗೆ ‘INS ಮಾಲ್ವಾಣ್’ ಎಂದು ಹೆಸರಿಸಲಾಗಿದೆ. ಇದಲ್ಲದೆ, ಶಿವಾಜಿ ಮಹಾರಾಜರ ಪ್ರಸಿದ್ಧ ಆಯುಧವಾದ ‘ಬಾಘ್ ನಖ್’ (ಹುಲಿಯ ಉಗುರು) ಅನ್ನು INS ಮಾಲ್ವಾಣ್ನ ಅಧಿಕೃತ ಲಾಂಛನವಾಗಿ ಅಳವಡಿಸಲಾಗಿದೆ. ಇದು ಶೌರ್ಯ, ಧೈರ್ಯ ಮತ್ತು ಕ್ಷಿಪ್ರ ದಾಳಿಯ ಸಂಕೇತವಾಗಿದೆ.
INS ಮಾಲ್ವಾಣ್ ಸೇರ್ಪಡೆಯೊಂದಿಗೆ ಭಾರತೀಯ ನೌಕಾಪಡೆಯ ಸಬ್ಮರಿನ್ ವಿರೋಧಿ ಕಾರ್ಯಾಚರಣಾ ಸಾಮರ್ಥ್ಯ ಮತ್ತಷ್ಟು ಬಲಗೊಂಡಿದ್ದು, ದೇಶದ ಸಾಗರ ಭದ್ರತೆಗೆ ಮಹತ್ವದ ಶಕ್ತಿ ಸೇರ್ಪಡೆಯಾದಂತಾಗಿದೆ.
