ಸುದ್ದಿಬಿಂದು ಬ್ಯೂರೋ ವರದಿ
ಬೆಂಗಳೂರು: ಮಾರ್ಚ್ 3ರಂದು ಆಕಾಶದಲ್ಲಿ ಕಾಣಿಸಿಕೊಳ್ಳಲಿರುವ ಚಂದ್ರಗ್ರಹಣ ಈ ವರ್ಷದ ಪ್ರಮುಖ ಖಗೋಳೀಯ ಘಟನೆಗಳಲ್ಲಿ ಒಂದಾಗಿ ಪರಿಗಣಿಸಲಾಗುತ್ತಿದೆ. ಸಾಯಂಕಾಲದ ವೇಳೆಗೆ ದೇಶದ ಹಲವೆಡೆ ಜನರು ಕೆಂಪು ವರ್ಣದ ಚಂದ್ರನ ದೃಶ್ಯವನ್ನು ಕಣ್ಣಾರೆ ನೋಡಬುದಾಗಿದೆ.
ಮಧ್ಯಾಹ್ನ ಸುಮಾರು 3:30ರಿಂದ ಸಂಜೆ 6:47ರವರೆಗೆ ಗ್ರಹಣದ ಪ್ರಭಾವ ಸ್ಪಷ್ಟವಾಗಿ ಕಾಣಿಸಿಕೊಳ್ಳಲಿದೆ.
ಈ ಬಾರಿ ಚಂದ್ರನು ಉದಯಿಸುವ ಕ್ಷಣದಲ್ಲೇ ಗ್ರಹಣದೊಳಗೆ ಇರುವುದರಿಂದ ಇದನ್ನು ಗ್ರಸ್ತೋದಯ ಚಂದ್ರಗ್ರಹಣ ಎಂದು ಕರೆಯಲಾಗುತ್ತಿದೆ. ಇಂತಹ ರೀತಿಯ ಸಂಪೂರ್ಣ ಚಂದ್ರಗ್ರಹಣ ಮತ್ತೆ ಕಾಣಿಸಿಕೊಳ್ಳಲು ಇನ್ನೂ ಕೆಲವು ವರ್ಷಗಳ ಕಾಲ ಕಾಯಬೇಕಾಗಿರುವುದರಿಂದ ಇದಕ್ಕೆ ವಿಶೇಷ ಮಹತ್ವ ಬಂದಿದೆ.
ಗ್ರಹಣದ ಸಮಯದಲ್ಲಿ ಚಂದ್ರನು ಕೆಂಪು ಬಣ್ಣಕ್ಕೆ ತಿರುಗುವ ಕಾರಣ ಇದನ್ನು ಬ್ಲಡ್ ಮೂನ್ ಎಂದೂ ಕರೆಯುತ್ತಾರೆ. ಇದು ವೈಜ್ಞಾನಿಕವಾಗಿ ಬೆಳಕಿನ ವಿಕಿರಣದಿಂದ ಉಂಟಾಗುವ ಸಹಜ ಪ್ರಕ್ರಿಯೆ.
ಸೂತಕ ಕಾಲ ಯಾವಾಗ?
ಭಾರತೀಯ ಸಂಪ್ರದಾಯಗಳ ಪ್ರಕಾರ ಚಂದ್ರಗ್ರಹಣ ಆರಂಭವಾಗುವುದಕ್ಕೆ ಸುಮಾರು 9 ಗಂಟೆಗಳ ಮೊದಲು ಸೂತಕ ಕಾಲ ಆರಂಭವಾಗುತ್ತದೆ. ಈ ಅವಧಿಯಲ್ಲಿ ದೇವಾಲಯ ಪ್ರವೇಶ, ಪೂಜೆ, ಅಡುಗೆ ಹಾಗೂ ಆಹಾರ ಸೇವನೆಗೆ ಸಂಬಂಧಿಸಿದ ಕೆಲವು ನಿಯಮಗಳನ್ನು ಕೆಲವರು ಪಾಲಿಸುತ್ತಾರೆ. ಇದು ಧಾರ್ಮಿಕ ನಂಬಿಕೆಯ ಭಾಗವಾಗಿದ್ದು, ವಿಜ್ಞಾನ ದೃಷ್ಟಿಯಿಂದ ಗ್ರಹಣ ಸಮಯದಲ್ಲಿ ಆಹಾರ ಸೇವನೆಗೆ ಯಾವುದೇ ಅಪಾಯವಿಲ್ಲ ಎಂಬುದನ್ನು ತಜ್ಞರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ/ಹೆಬ್ಬೆಟ್ಟು ಗಿರಾಕಿಗಳು ನಾವಲ್ಲ : ಕೆಡಿಪಿ ಸಭೆಯಲ್ಲಿ ಶಾಸಕ ಸೈಲ್ ಆಕ್ರೋಶ
